గురుకులంలో ఘనంగా “ఏక్ భారత్ శ్రేష్ఠ భారత్” కార్యక్రమం
* హర్యానా సంస్కృతి, సంప్రదాయాలను ప్రదర్శించిన విద్యార్థులు..
కాకతీయ,చేర్యాల: చేర్యాలలోని తెలంగాణ సోషల్ వెల్ఫేర్ రెసిడెన్షియల్ పాఠశాలలో కేంద్ర ప్రభుత్వ ఆదేశాల మేరకు “ఏక్ భారత్ శ్రేష్ఠ భారత్” కార్యక్రమాన్ని గురువారం ఘనంగా నిర్వహించారు. కార్యక్రమంలో భాగంగా విద్యార్థులు హర్యానా రాష్ట్రానికి చెందిన సంస్కృతి, సంప్రదాయాలు, కళలు, జీవన విధానాన్ని తమ ప్రదర్శనల ద్వారా ఆవిష్కరించారు.ఈ సందర్భంగా పాఠశాల ప్రిన్సిపాల్ పోలోజు నరసింహాచారి మాట్లాడుతూ.. భారతదేశం భిన్న భాషలు, సంస్కృతులు, సంప్రదాయాలకు నిలయమైనప్పటికీ “భిన్నత్వంలో ఏకత్వం” భారతదేశ ప్రత్యేకత అని అన్నారు. దేశంలోని వైవిధ్యాన్ని గౌరవిస్తూ, జాతీయ సమైక్యతను బలోపేతం చేయాల్సిన బాధ్యత ప్రతి ఒక్కరిపై ఉందని తెలిపారు.విద్యార్థులు దేశంలోని వివిధ రాష్ట్రాల సంస్కృతులు, సంప్రదాయాలను తెలుసుకోవడం ద్వారా జాతీయ సమైక్యత, సోదరభావం, ఐకమత్యం మరింత బలపడతాయని పేర్కొన్నారు. దేశ సమగ్రతను కాపాడటంలో విద్యార్థులు కీలక పాత్ర పోషించాలని సూచించారు.క్రమశిక్షణ, ఐకమత్యం, దేశభక్తి విలువలను అలవర్చుకుని శ్రేష్ఠమైన భారతదేశ నిర్మాణానికి విద్యార్థులు కృషి చేయాలని ప్రిన్సిపాల్ పిలుపునిచ్చారు.ఈ కార్యక్రమంలో పాఠశాల అధ్యాపకులు, సిబ్బంది, విద్యార్థులు పాల్గొని కార్యక్రమాన్ని విజయవంతం చేశారు.
