తడికలపూడి మానవత సేవలు ఆదర్శనీయం
8 ఏళ్ల తర్వాత యూనిట్‌ను సందర్శించిన వ్యవస్థాపకులు
ఫ్రీజర్లు, కైలాసరథం భవనం ప్రారంభం
మానవత వ్యవస్థాపకులు ఎన్‌. రామచంద్రారెడ్డి ప్రశంసలు
కాకతీయ, ఏలూరు ప్రతినిధి : తడికలపూడి మానవత స్వచ్ఛంద సేవా సంస్థ సేవలు ఆదర్శనీయమని సంస్థ వ్యవస్థాపకులు ఎన్‌. రామచంద్రారెడ్డి అన్నారు. 8 సంవత్సరాల తర్వాత మంగళవారం తడికలపూడి యూనిట్‌ను సందర్శించిన ఆయన పలు కార్యక్రమాల్లో పాల్గొన్నారు. సంస్థకు చెందిన ఫ్రీజర్లు, కైలాసరథం భద్రపరిచే భవనం, కైలాసరథాన్ని ప్రారంభించారు. అనంతరం మానవత స్టేట్‌ కన్వీనర్‌ మారుబోయిన కోటేశ్వరరావు, సెంట్రల్‌ కమిటీ చైర్మన్‌ కండెపు సూర్యనారాయణ, జిల్లా అధ్యక్షులు వి. చంద్రయ్యతో కలిసి మానవత భవనం చుట్టూ మొక్కలు నాటారు. కైలాసరథం దాత సూర్య మోటార్స్‌ అధినేత చామర్తి కృష్ణారావు, మార్చురీ ఫ్రీజర్‌ దాత పారేపల్లి పుల్లాచారీ, భవన నిర్మాణానికి సహకరించిన కోరుకొండ రాంబాబు బ్రదర్స్‌, మొట్టికాయల నాగేశ్వరరావు, మట్టే కుటుంబ సభ్యులను అభినందించి సత్కరించారు. తడికలపూడి మానవత శాఖ పూర్వ అధ్యక్షులు వి. పార్వతీ శంకర్‌ అనారోగ్యంతో బాధపడుతున్న నేపథ్యంలో ఆయన త్వరగా కోలుకోవాలని ఆకాంక్షించారు. కార్యక్రమంలో శాఖ అధ్యక్షులు మిర్యాల చంద్రశేఖర్‌, చైర్మన్‌ కరుటూరి గంగాధర ప్రసాద్‌, ముళ్లపూడి వెంకటేశ్వరరావు, మలకలపల్లి రాఘవయ్య, గుడపాటి శ్రీనివాసరావు, కమ్మ శ్రీనివాసరావు, కొనకళ్ల కృష్ణారావు, మాదు గంగాధరరావు, పెరవలి శ్రీను, మానవత సభ్యులు పాల్గొన్నారు.
