డ్రగ్స్‌ రహిత వరంగలే లక్ష్యం!
ఆరు ప్రాంతాల్లో పోలీసుల ఆకస్మిక తనిఖీలు
107 మందికి పరీక్షలు.. 29 మందికి పాజిటివ్ : సీపీ ఎన్‌. శ్వేత
కాకతీయ, వరంగల్: నేరరహిత వరంగల్, డ్రగ్స్‌ రహిత సమాజమే లక్ష్యంగా ప్రత్యేక చర్యలు చేపడుతున్నామని పోలీస్‌ కమిషనర్‌ ఎన్‌. శ్వేత స్పష్టం చేశారు. శుక్రవారం తెల్లవారుజామున సెంట్రల్‌ జోన్‌ డీసీపీ ధారా కవిత ఆధ్వర్యంలో ఆటోనగర్‌, కరీమాబాద్‌, కాశీబుగ్గ, శంభునిపేట, శివనగర్‌, ఎల్‌బీనగర్‌ ప్రాంతాల్లో పోలీసులు ఆకస్మిక తనిఖీలు నిర్వహించారు. ఈ సందర్భంగా రౌడీషీటర్లు, పాత నేరస్థులు, డ్రగ్స్‌ కేసులతో సంబంధం ఉన్నవారు, అనుమానితులు కలిపి 107 మందికి పరీక్షలు నిర్వహించగా 29 మందికి పాజిటివ్ వచ్చినట్లు సీపీ తెలిపారు. వారిపై చట్టప్రకారం చర్యలు తీసుకుంటామన్నారు. సరైన ధ్రువపత్రాలు, నంబర్‌ ప్లేట్లు లేని 17 ద్విచక్రవాహనాలు, రెండు కార్లు, మూడు విద్యుత్‌ మోటార్లను స్వాధీనం చేసుకున్నట్లు వెల్లడించారు. మిల్స్‌ కాలనీ పోలీస్‌స్టేషన్‌లో పీఐటీఏ చట్టం కింద కేసు నమోదు చేసినట్లు పేర్కొన్నారు. డ్రగ్స్‌ సరఫరా, విక్రయాలు, అక్రమ రవాణాకు పాల్పడితే కఠిన చర్యలు తప్పవని హెచ్చరించారు. వ్యసనానికి గురైన వారికి చికిత్స, కౌన్సెలింగ్‌ అందిస్తామని తెలిపారు. కమ్యూనిటీ కనెక్ట్‌లో భాగంగా స్థానికులతో మాట్లాడి నేరాల నియంత్రణకు ప్రతి కాలనీలో సీసీటీవీ కెమెరాలు ఏర్పాటు చేసుకోవాలని సూచించారు. ఇలాంటి తనిఖీలు నిరంతరం కొనసాగుతాయని, సమాచారం ఉంటే డయల్‌ 100 లేదా 112కు తెలియజేయాలని కోరారు. కార్యక్రమంలో ఇన్‌చార్జి ఏసీపీ నరసింహారావు, పలు పోలీస్‌స్టేషన్ల ఇన్‌స్పెక్టర్లు, సిబ్బంది పాల్గొన్నారు.
