హాస్టల్ ఏఎన్ఎంల సమస్యలు పరిష్కరించాలి
పెండింగ్ వేతనాలు విడుదల చేయాలి
సెలవులకు జీతాల కోతలు విధించవద్దు..సీఐటీయూ
కాకతీయ,ఏటూరునాగారం : గిరిజన సంక్షేమ శాఖ పరిధిలోని హాస్టళ్లు, ఆశ్రమ పాఠశాలలు, పోస్ట్మెట్రిక్ వసతి గృహాల్లో పనిచేస్తున్న ఔట్సోర్సింగ్ ఏఎన్ఎంల సమస్యలను పరిష్కరించాలని సీఐటీయూ డిమాండ్ చేసింది. అక్టోబర్ నెల పెండింగ్ వేతనాలను వెంటనే విడుదల చేయాలని, సెలవుల పేరుతో వేతనాల్లో కోతలు విధించవద్దని కోరుతూ సీఐటీయూ ఆధ్వర్యంలో బుధవారం ఐటీడీఏ పీఓ లెనిన్ వత్సల్ టోప్పోకు వినతిపత్రం అందజేశారు. ఈ సందర్భంగా సీఐటీయూ జిల్లా కార్యదర్శి రత్నం రాజేందర్ మాట్లాడుతూ.. ములుగు జిల్లాలో ఔట్సోర్సింగ్ ఏజెన్సీ బ్యాంకు ఖాతా నంబర్ తప్పుగా నమోదు చేయడంతో ప్రతి నెలా ఏఎన్ఎంల వేతనాల చెల్లింపులో సమస్యలు తలెత్తుతున్నాయని తెలిపారు. ఖాతా నంబర్ను ప్రభుత్వ ఆర్థిక శాఖ వద్ద సరిచేయించడంలో ఐటీడీఏ అధికారులు, ఔట్సోర్సింగ్ ఏజెన్సీ యాజమాన్యం నిర్లక్ష్యం వహిస్తున్నారని విమర్శించారు. ప్రభుత్వం వేతనాల కోసం నిధులు విడుదల చేసినప్పటికీ ఖాతా వివరాల్లో తప్పిదాల కారణంగా ఏఎన్ఎంలకు సకాలంలో జీతాలు అందడం లేదని, తక్షణమే ఈ సమస్యను పరిష్కరించి పెండింగ్ వేతనాలు చెల్లించాలని డిమాండ్ చేశారు. చట్టప్రకారం ప్రతి ఉద్యోగికి వారాంతపు సెలవులతో పాటు 15 క్యాజువల్ సెలవులు కల్పించాల్సి ఉన్నప్పటికీ వాటిని అమలు చేయకుండా అక్రమంగా వేతనాల్లో కోతలు విధిస్తున్నారని ఆవేదన వ్యక్తం చేశారు. పండుగలు, వేసవి సెలవుల పేరుతోనూ జీతాలు తగ్గించి చెల్లించడం సరికాదని, ఇతర ఔట్సోర్సింగ్ ఉద్యోగుల మాదిరిగానే ఏఎన్ఎంలకు కూడా పండుగ, వేసవి సెలవుల కాలానికి పూర్తి వేతనాలు చెల్లించాలని కోరారు. వేతనంతో కూడిన వారాంతపు సెలవులు, ప్రసూతి సెలవులు కల్పించాలని డిమాండ్ చేశారు. ఔట్సోర్సింగ్ ఏజెన్సీలను రద్దు చేసి ప్రభుత్వమే నేరుగా వేతనాలు చెల్లించాలని, పీఎఫ్, ఈఎస్ఐ నిధులను సక్రమంగా జమ చేయని ఏజెన్సీలను బ్లాక్లిస్ట్లో పెట్టాలని కోరారు. ఈ కార్యక్రమంలో సీఐటీయూ మాజీ జిల్లా అధ్యక్షుడు ఎండీ దావూద్, కోట నర్సింహులు, ఏఎన్ఎంలు శాంతి, స్వరూప, గీతాంజలి, రాజమణి, విజయకుమారి, అరుణ, ప్రియదర్శిని, జ్యోతి, ప్రమీల, పుణ్యవతి, సుజాత, అరుణ, నాగలక్ష్మి, రమ్య, వినోద తదితరులు పాల్గొన్నారు.

