భారత్కు చుక్కలు చూపించిన సౌతాఫ్రికా కొత్త హీరో.. ఎవరీ ముత్తుసామి?
గౌహతి టెస్ట్లో మెరిసిన సౌతాఫ్రికా సూపర్ హీరో ముత్తుసామి
తమిళనాడు మూలాలున్న దక్షిణాఫ్రికన్
తండ్రి కల… కానీ 11 ఏటనే ఎదురైన పెద్ద దెబ్బ
కాకతీయ, స్పోర్ట్స్ : గౌహతి వేదికగా భారత్తో జరిగిన రెండో టెస్టులో సౌతాఫ్రికా ఆల్రౌండర్ సెనురాన్ ముత్తుసామి పేలవంగా ప్రారంభమైన ఇన్నింగ్స్ను అద్భుతమైన సెంచరీతో కొత్త మలుపు తిప్పాడు. 206 బంతుల్లో 10 ఫోర్లు, 2 సిక్స్లతో 109 రన్స్ కొట్టి టాప్ స్కోరర్గా నిలిచిన అతను, టెయిలెండర్లతో కీలక భాగస్వామ్యాలు నిర్మించి సౌతాఫ్రికాను 489 పరుగుల భారీ స్కోర్దిశగా నడిపించాడు. అసాధారణ బ్యాటింగ్తో భారత్ కు చుక్కలు చూపించిన ఈ సౌతాఫ్రికా కొత్త హీరో గురించి తెలుసుకునేందుకు క్రికెట్ అభిమానులు ప్రస్తుతం ఎంతో ఉత్సాహం చూపుతున్నారు.
సెనురాన్ ముత్తుసామి కుటుంబం అసలు తమిళనాడులోని నాగపట్నం ప్రాంతానికి చెందినది. అతడు పుట్టకముందే కుటుంబం దక్షిణాఫ్రికాకు వెళ్లి అక్కడే స్థిరపడింది.1994 ఫిబ్రవరి 22న డర్బన్లో జన్మించిన ముత్తుసామి, నటల్ ప్రావిన్స్లో పెరిగాడు. క్లిఫ్టన్ కాలేజీలో చదువు ప్రారంభించి, క్వాజులు-నాటల్ యూనివర్సిటీలో సోషల్ సైన్స్లో బ్యాచిలర్ కంప్లీట్ చేశాడు. తర్వాత మీడియా, మార్కెటింగ్లో స్పెషలైజేషన్ చేశాడు.
అతన్ని క్రికెట్లోకి తీసుకొచ్చింది అతని తండ్రే. కానీ ముత్తుసామి వయసు 11 ఏళ్లు ఉన్నప్పుడు తండ్రి మృతి చెందడంతో అతని కుటుంబం పెద్ద షాక్కి గురైంది. తండ్రి కోరిక నెరవేర్చాలని నిర్ణయించుకున్న ముత్తుసామి రోజుకు 5–6 గంటలు ప్రాక్టీస్ చేస్తూ ఆటలో మెరుగు పడ్డాడు. అండర్-11 నుంచి అండర్-19 వరకు క్వాజులు నాటల్ జట్టు తరఫున ఆడిన ముత్తుసామి, ఆరంభంలో క్రికెట్ను కెరీర్గా తీసుకోవడంలో సందేహపడ్డాడు. అయితే అద్భుత ప్రదర్శనలతో సౌతాఫ్రికా అండర్-19 జట్టులోకి అడుగుపెట్టాడు.
2011-16లో డాల్ఫిన్స్ తరఫున టాప్ ఆర్డర్ బ్యాటర్గా ఆడాడు. 2017లో నైట్స్పై 181 పరుగుల ఇన్నింగ్స్తో హిట్ అయినప్పటికీ.. ఆ ఫామ్ ఎక్కువకాలం నిలవలేదు. బ్యాటింగ్ తగ్గినా బౌలింగ్లో మెరుస్తూ ఆల్రౌండర్గా మారాడు. 2019లో భారత్ పర్యటనతో ఇంటర్నేషనల్ క్రికెట్లో అడుగుపెట్టాడు. అప్పటి మ్యాచ్లో కోహ్లీని రిటర్న్ క్యాచ్తో పెవిలియన్ చేర్చి ఫోకస్ అయ్యాడు. కానీ కేశవ్ మహరాజ్ అద్భుత ప్రదర్శన కారణంగా జట్టులో స్థిరంగా అవకాశాలు రాలేదు. అయినా కష్టపడి వచ్చిన అవకాశాలను సద్వినియోగం చేసుకుంటూ ఎదిగాడు. ఇక గౌహతి టెస్ట్లో సెంచరీ చేసి భారత్ గెలుపు ఆశలను చిదిమేసిన ముత్తుసామి, ఈ ఒక్క ఇన్నింగ్స్తో కేవలం మ్యాచ్ను మార్చడమే కాదు.. తన కెరీర్ను కూడా రీబ్రాండ్ చేసుకున్నాడు. అతని డిఫెన్స్, షాట్ సెలెక్షన్, టెయిలెండర్లతో చేసే భాగస్వామ్యాలు దక్షిణాఫ్రికాకు ఊహించని ఎడ్జ్ను ఇచ్చాయి అనడంలో సందేహం లేదు.
