కరెంట్‌ కోతల పాపం రేవంత్‌రెడ్డిదే!
దేవాదుల పంపులు ఎందుకు ఆన్‌ చేయలేదు?
ప్రభుత్వంపై మాజీ మంత్రి ఎర్రబెల్లి విమర్శలు
గ్రాడ్యుయేట్‌ ఎమ్మెల్సీ ఓటరు నమోదుపై ఎర్రబెల్లి సమీక్ష
కాకతీయ, పర్వతగిరి : గ్రాడ్యుయేట్‌ ఎమ్మెల్సీ ఎన్నికల్లో పట్టభద్రుల భాగస్వామ్యం పెరిగేలా ప్రతి నాయకుడు, కార్యకర్త బాధ్యతగా పనిచేయాలని మాజీ మంత్రి ఎర్రబెల్లి దయాకర్‌రావు పిలుపునిచ్చారు. నవంబర్‌ 3న పర్వతగిరి మండల కేంద్రంలోని తన నివాసంలో బీఆర్ఎస్ ముఖ్య నాయకులతో నిర్వహించిన సమీక్షా సమావేశంలో ఆయన మాట్లాడారు. అర్హులైన ప్రతి పట్టభద్రుడిని గుర్తించి ఓటరుగా నమోదు చేయించాలని, గ్రామాల్లో విస్తృతంగా అవగాహన కల్పించాలని సూచించారు. కరోనా సమయంలో ప్రజలకు నీరు, విద్యుత్‌ సహా అవసరమైన సేవలు అందించిన ఘనత మాజీ ముఖ్యమంత్రి కేసీఆర్‌దేనని అన్నారు. ప్రస్తుత ప్రభుత్వం కరెంట్‌ కోతలను నియంత్రించడంలో విఫలమైందని విమర్శించారు. దేవాదుల ప్రాజెక్టులో పంపులు ఎందుకు ఆన్‌ చేయలేదని ప్రశ్నించారు. మోటార్ల మరమ్మతులకు కూడా నిధులు లేవని అధికారులు చెబుతున్నారని పేర్కొన్నారు. ఎనిమిది నెలలు కష్టమని ముఖ్యమంత్రి చేతులెత్తేయడం ఏమిటని ప్రశ్నించారు. తెలంగాణలో భూముల ధరలు పడిపోవడానికి రేవంత్‌రెడ్డి పాలనే కారణమని ఆరోపించారు. పట్టభద్రుల ఓటరు నమోదు కార్యక్రమాన్ని నాయకులు సమన్వయంతో ముందుకు తీసుకెళ్లాలని కోరారు.
