మానుకోట మున్సిపాలిటీలో హంగ్
చైర్పర్సన్ పీఠం కోసం కాంగ్రెస్, బీఆర్ఎస్ మధ్య హోరాహోరీ పోరు
మెజార్టీకి దూరంగా ప్రధాన పార్టీలు
స్వతంత్రులకు పెరిగిన డిమాండ్
మ్యాజిక్ ఫిగర్ 19 చేరుకునేందుకు ఇరు పార్టీల మంతనాలు
స్వతంత్రులకు చైర్పర్సన్ ఆఫర్ చేస్తున్న కాంగ్రెస్
కూతురిని చైర్పర్సన్ చేయాలన్న లక్ష్యంతో శంకర్ నాయక్ ప్రయత్నాలు
కాకతీయ, మహబూబాబాద్ : ఫిబ్రవరి 2026లో జరిగిన తెలంగాణ మున్సిపల్ ఎన్నికల ఫలితాల్లో మహబూబాబాద్ (మానుకోట) మున్సిపాలిటీలో హంగ్ పరిస్థితి ఏర్పడింది. మొత్తం 36 వార్డులు ఉన్న ఈ మున్సిపాలిటీలో చైర్పర్సన్ పదవి దక్కించుకోవడానికి అవసరమైన మ్యాజిక్ ఫిగర్ 19కు ఏ పార్టీ చేరుకోకపోవడంతో రాజకీయంగా ఉత్కంఠభరిత పరిస్థితులు నెలకొన్నాయి. కాంగ్రెస్, బీఆర్ఎస్ పార్టీలు మెజార్టీకి దూరంగా నిలవడంతో స్వతంత్ర అభ్యర్థులు కీలకంగా మారారు. దీంతో అధికారాన్ని కైవసం చేసుకునేందుకు ఇరు పార్టీలు తీవ్రంగా ప్రయత్నాలు ప్రారంభించాయి. ఫలితాల ప్రకారం బీఆర్ఎస్ పార్టీ 13 వార్డుల్లో విజయం సాధించి సింగిల్ లార్జెస్ట్ పార్టీగా నిలిచింది. కాంగ్రెస్ పార్టీ 12 వార్డుల్లో గెలిచి గట్టి పోటీ ఇస్తోంది. ఇతర పార్టీల్లో సీపీఎం 3, సీపీఐ 3, బీజేపీ 1 స్థానంలో విజయం సాధించగా, స్వతంత్రులు 4 వార్డుల్లో గెలుపొందారు. ఈ పరిస్థితుల్లో చైర్పర్సన్ ఎంపికలో స్వతంత్రుల పాత్ర కీలకంగా మారింది.
స్వతంత్రులపై దృష్టి… అధికారానికి కీలక మద్దతు
మెజార్టీకి దూరంగా ఉన్న కాంగ్రెస్, బీఆర్ఎస్ పార్టీలు స్వతంత్ర కౌన్సిలర్ల మద్దతు కోసం ముమ్మరంగా ప్రయత్నాలు చేస్తున్నాయి. ముఖ్యంగా కాంగ్రెస్ పార్టీ స్వతంత్రుల్లో ఒకరికి చైర్పర్సన్ పదవిని ఆఫర్ చేసినట్లు రాజకీయ వర్గాల్లో చర్చ జరుగుతోంది. చైర్పర్సన్ పీఠాన్ని దక్కించుకోవడానికి ఇరు పార్టీలు వ్యూహాత్మకంగా అడుగులు వేస్తుండటంతో స్వతంత్రుల ప్రాధాన్యం మరింత పెరిగింది. ఇదే సమయంలో సీపీఎం, సీపీఐ వంటి పార్టీల మద్దతు కూడా అధికార సమీకరణాల్లో కీలకంగా మారింది. బీజేపీ మద్దతు ఎటువైపు ఉంటుందన్నది కూడా రాజకీయంగా ఆసక్తికరంగా మారింది. దీంతో మున్సిపాలిటీలో చైర్పర్సన్ ఎన్నిక వరకు రాజకీయ పరిణామాలు వేగంగా మారే అవకాశాలు కనిపిస్తున్నాయి.
కూతురి కోసం శంకర్ నాయక్ పావులు
మాజీ ఎమ్మెల్యే బానోత్ శంకర్ నాయక్ ఈ ఎన్నికల్లో కీలకంగా వ్యవహరిస్తున్నారు. ఆయన కుమార్తె తేజస్విని మున్సిపల్ ఎన్నికల్లో విజయం సాధించడంతో, ఆమెను చైర్పర్సన్ చేయాలన్న లక్ష్యంతో ఆయన వ్యూహాలు రచిస్తున్నట్లు సమాచారం. స్వతంత్రులు, ఇతర పార్టీల మద్దతు పొందేందుకు ఆయన తీవ్రంగా ప్రయత్నాలు చేస్తున్నట్లు తెలుస్తోంది. రాజకీయంగా చురుకైన శంకర్ నాయక్ తన ప్రభావాన్ని ఉపయోగించి మద్దతు సమీకరించే దిశగా కదులుతున్నట్లు రాజకీయ వర్గాలు చెబుతున్నాయి. దీంతో చైర్పర్సన్ ఎన్నిక మరింత ఆసక్తికరంగా మారింది.
ఎక్స్ అఫీషియో ఓట్లు నిర్ణయాత్మకం
మహబూబాబాద్ మున్సిపాలిటీలో ఎక్స్ అఫీషియో ఓట్లు కూడా కీలకంగా మారనున్నాయి. ఎమ్మెల్యేలు, ఎంపీలు, ఎమ్మెల్సీలకు ఉండే ఈ ఓట్లు చైర్పర్సన్ ఎన్నికలో తుది ఫలితాన్ని ప్రభావితం చేసే అవకాశముంది. ఇరు పార్టీలకు చెరో ఎక్స్ అఫీషియో ఓట్లు ఉండడం వల్ల సమీకరణాలు మరింత క్లిష్టంగా మారాయి. ఇదే సమయంలో కేసముద్రం మున్సిపాలిటీలో కూడా కాంగ్రెస్, బీఆర్ఎస్ చెరో 8 స్థానాలు గెలవడంతో అక్కడ కూడా ఉత్కంఠ నెలకొంది. ఎక్స్ అఫీషియో సభ్యులు ఎటువైపు ఓటు వేస్తారన్నది ఇప్పుడు ప్రధాన చర్చనీయాంశంగా మారింది. చైర్పర్సన్ ఎన్నిక వరకు మహబూబాబాద్ మున్సిపాలిటీలో రాజకీయాలు మరింత వేడెక్కే అవకాశముంది. స్వతంత్రుల మద్దతు, ఎక్స్ అఫీషియో ఓట్లు, పార్టీ వ్యూహాలు—ఇవన్నీ కలిసి తుది ఫలితాన్ని నిర్ణయించనున్నాయి.
