దేశ ప్రజలు కాంగ్రెస్‌కు మద్దతివ్వాలి
ఓట్ల తొలగింపుపై ప్రశ్నిస్తే అరెస్టులా?
మోదీ పాలనలో ప్రజాస్వామ్య హక్కులకు భంగం
బీసీ రిజర్వేషన్ల కోసం ఢిల్లీ వరకు ఉద్యమం
రాష్ట్ర ప్ర‌భుత్వ స‌ల‌హాదారు వి. హనుమంతరావు
కాకతీయ, హైదరాబాద్ : రాజ్యాంగం కల్పించిన ఓటు హక్కును పరిరక్షించేందుకు పోరాడుతున్న కాంగ్రెస్ పార్టీకి ప్రజలు మద్దతు ఇవ్వాలని వి.హెచ్. పిలుపునిచ్చారు. ఓట్ల తొలగింపుపై ప్రశ్నిస్తూ ఎన్నికల సంఘాన్ని నిలదీస్తున్న రాహుల్ గాంధీ, ప్రియాంక గాంధీలకు ప్రజలు అండగా నిలవాలని కోరారు. శ‌నివారం గాంధీభ‌వ‌న్‌లో హనుమంతరావు విలేక‌రుల‌తో మాట్లాడారు. దేశంలో ఇంతటి నియంతృత్వ పాలనను ఎక్కడా చూడలేదని కేంద్ర ప్రభుత్వంపై విమర్శలు చేశారు. ఢిల్లీలో గత 4 రోజులుగా చీఫ్ ఎలక్షన్ కమిషనర్ రాజీనామా చేయాలని రాహుల్ గాంధీ నాయకత్వంలో ఉద్యమాలు జరుగుతున్నాయని తెలిపారు. 13 కోట్ల ఓట్లను రద్దు చేశారని ఆరోపిస్తూ, ఈ అంశంపై ఎన్నికల కమిషనర్‌ను కలవడానికి ప్రయత్నించినా అవకాశం కల్పించలేదని పేర్కొన్నారు. ఓట్ల తొలగింపుపై సవరణలు చేయాలని కోరితే అరెస్టులకు పాల్పడుతున్నారని, కాంగ్రెస్‌కు అనుకూలంగా ఉన్న వారి ఓట్లను తొలగిస్తున్నారని ఆరోపించారు. ఎంపీలతో పాటు జనతాదళ్ పార్టీ నాయకులను కూడా అరెస్టు చేశారని వి.హెచ్. అన్నారు. రైళ్లలో ప్రయాణిస్తున్న వారిని సైతం అరెస్టు చేస్తున్నారని విమర్శించారు. గతంలో ఎమర్జెన్సీ సమయంలో ఇందిరా గాంధీని అప్రతిష్ఠపాలు చేశారని, ప్రస్తుతం ప్రధానమంత్రి మోదీ అంతకంటే ఘోరంగా వ్యవహరిస్తున్నారని ఆరోపించారు. నాలుగోసారి అధికారంలోకి రావాలనే లక్ష్యంతో మోదీ నాటకాలు ఆడుతున్నారని విమర్శించారు. బీసీలకు స్థానిక సంస్థల ఎన్నికల్లో రాజ్యాంగబద్ధంగా రిజర్వేషన్లు కల్పించేందుకు చంద్రబాబు నాయుడు కృషి చేయాలని వి.హెచ్. కోరారు. ఎన్టీఆర్ బీసీల అభ్యున్నతి కోసం పనిచేశారని, ప్రస్తుతం చంద్రబాబు నాయుడు బీసీలకు అన్యాయం చేస్తున్నారని విమర్శించారు. కేంద్రంలో చంద్రబాబు పార్టీ మద్దతుతోనే మోదీ ప్రభుత్వం కొనసాగుతోందని, ఈ నేపథ్యంలో బీసీలకు న్యాయం జరిగేలా చర్యలు తీసుకోవాలని అన్నారు. కాంగ్రెస్ పార్టీ ఆధ్వర్యంలో 100 రోజుల పాటు బీసీ ఉద్యమం కొనసాగుతుందని తెలిపారు. ఓబీసీ ఉద్యమాన్ని ఢిల్లీ వరకు తీసుకెళ్తామని ప్రకటించారు. భావితరాల భవిష్యత్తు కోసం బీసీలు అవసరమైతే ప్రాణత్యాగానికైనా సిద్ధమై రిజర్వేషన్లు సాధించాలని, ఢిల్లీలో కేంద్ర ప్రభుత్వంపై ఒత్తిడి తీసుకురావాలని వి.హెచ్. పిలుపునిచ్చారు.
