కేరళ మాజీ సీఎం విజయన్‌కు హైకోర్టులో షాక్‌!
కుమార్తె సంస్థ చెల్లింపులపై ఎఫ్‌ఐఆర్‌కు ఆదేశం
వీణా, భర్త మహమ్మద్‌ రియాస్‌ పేర్లూ ప్రస్తావనలోకి
రూ.1.72 కోట్ల చెల్లింపులపై అవినీతి ఆరోపణలు
ప్రాథమిక విచారణతో సరిపెట్టిన రాష్ట్ర ప్రభుత్వ నిర్ణయానికి ఎదురుదెబ్బ
ఎస్‌ఎఫ్‌ఐఓ అంచనా ప్రకారం సంస్థకు రూ.2.73 కోట్లు
కాకతీయ, నేష‌న‌ల్ డెస్క్ : కుమార్తె వీణాకు చెందిన సంస్థకు అక్రమ చెల్లింపులు జరిగాయన్న ఆరోపణలపై కేరళ మాజీ సీఎం, సీపీఎం సీనియర్‌ నేత పినరయి విజయన్‌కు హైకోర్టులో ఎదురుదెబ్బ తగిలింది. ఈ వ్యవహారంలో విజయన్‌, ఆయన కుమార్తె వీణా, ఆమె భర్త, మాజీ మంత్రి మహమ్మద్‌ రియాస్‌ తదితరులపై ఎఫ్‌ఐఆర్‌ నమోదు చేయాలని కేరళ హైకోర్టు ఆదేశించింది. జస్టిస్‌ బదరుద్దీన్‌ నేతృత్వంలోని ఏకసభ్య ధర్మాసనం రాష్ట్ర విజిలెన్స్‌, అవినీతి నిరోధక విభాగాలకు ఈ మేరకు ఉత్తర్వులు జారీ చేసింది. వీణాకు చెందిన ఎక్సాలాజిక్‌ సొల్యూషన్స్‌ సంస్థకు కొచ్చి మినరల్స్‌ అండ్‌ రూటైల్‌ లిమిటెడ్‌ నుంచి సాఫ్ట్‌వేర్‌, కన్సల్టెన్సీ సేవల పేరుతో 2017-18, 2018-19 ఆర్థిక సంవత్సరాల్లో సుమారు రూ.1.72 కోట్లు చెల్లించినట్లు ఆరోపణలు వచ్చాయి. ఈ వ్యవహారంపై 2023లో ఆదాయపు పన్ను శాఖ అధికారులు సోదాలు నిర్వహించడంతో విషయం వెలుగులోకి వచ్చింది. అనంతరం ఎన్‌ఫోర్స్‌మెంట్‌ డైరెక్టరేట్‌, సీరియస్‌ ఫ్రాడ్‌ ఇన్వెస్టిగేషన్‌ ఆఫీస్‌ దర్యాప్తు చేపట్టాయి. ఎక్సాలాజిక్‌ సంస్థ మొత్తం రూ.2.73 కోట్లు పొందినట్లు ఎస్‌ఎఫ్‌ఐఓ అంచనా వేసింది.
ప్రాథమిక విచారణపై సవాల్‌
ఈ కేసులో విజయన్‌, వీణా, రియాస్‌ తదితరులపై అవినీతి నిరోధక చట్టం కింద ఎఫ్‌ఐఆర్‌ నమోదు చేయాలని తొలుత ఎన్‌ఫోర్స్‌మెంట్‌ డైరెక్టరేట్‌ సిఫార్సు చేసినట్లు సమాచారం. అయితే రాష్ట్ర ప్రభుత్వం నేరుగా ఎఫ్‌ఐఆర్‌ నమోదు చేయకుండా రాష్ట్ర క్రైమ్‌ బ్రాంచ్‌తో ప్రాథమిక విచారణకు ఆదేశించింది. ఈ నిర్ణయాన్ని సవాల్‌ చేస్తూ మాజీ సీఎం వీఎస్‌ అచ్యుతానందన్‌ వద్ద అదనపు ప్రైవేట్‌ కార్యదర్శిగా పనిచేసిన కేఎం షాజహాన్‌ హైకోర్టును ఆశ్రయించారు. పిటిషన్‌పై విచారణ జరిపిన న్యాయస్థానం ఎఫ్‌ఐఆర్‌ నమోదు చేయాలని ఆదేశించింది. వీణా, ఎక్సాలాజిక్‌ సంస్థ ఎలాంటి తప్పు చేయలేదని సీపీఎం వాదిస్తోంది. సదరు చెల్లింపులు చట్టబద్ధమైన వ్యాపార ఒప్పందాల్లో భాగమేనని పేర్కొంది. రాజకీయ ప్రేరణతోనే ఎన్‌ఫోర్స్‌మెంట్‌ డైరెక్టరేట్‌ సోదాలు నిర్వహించిందని ఆరోపించింది. అయితే హైకోర్టు తాజా ఆదేశాలతో ఈ వ్యవహారంలో తదుపరి దర్యాప్తుపై ఆసక్తి నెలకొంది.
లావలిన్‌ కేసులోనూ గతంలో విచారణ
విజయన్‌ గతంలో విద్యుత్‌ మంత్రిగా ఉన్న సమయంలో తీసుకున్న నిర్ణయాలకు సంబంధించి ఎస్‌ఎన్‌సీ లావలిన్‌ కేసులోనూ సీబీఐ దర్యాప్తు జరిగింది. 1995-97 మధ్య కేరళలో జలవిద్యుత్‌ ప్రాజెక్టుల ఆధునికీకరణ కోసం కెనడాకు చెందిన ఎస్‌ఎన్‌సీ లావలిన్‌ సంస్థతో ఒప్పందం కుదిరింది. ఈ ఒప్పందం వల్ల రాష్ట్ర ఖజానాకు రూ.374.50 కోట్ల నష్టం వాటిల్లిందన్న అభియోగాల నేపథ్యంలో విజయన్‌ పేరు కేసులో ప్రస్తావనకు వచ్చింది.
