విహారయాత్రలో విషాదం..
ప్రమాదవశాత్తు నీటిలో మునిగి ఐదుగురు మహిళలు దుర్మరణం
శ్రీ సత్యసాయి జిల్లా పెనుకొండ గొల్లపల్లి జలాశయం విషాద ఘటన
మృతుల కుటుంబాలకు సీఎం చంద్రబాబు, పవన్‌ కల్యాణ్‌ సంతాపం
కాకతీయ, పెనుకొండ : సరదాగా గడిపేందుకు గొల్లపల్లి జలాశయానికి వెళ్లిన ఐదుగురు మహిళలు నీటిలో మునిగి మృత్యువాత పడ్డారు. శ్రీ సత్యసాయి జిల్లా పెనుకొండలో చోటుచేసుకున్న ఈ విషాద ఘటన పట్టణాన్ని తీవ్ర దిగ్భ్రాంతికి గురిచేసింది. మృతులంతా పెనుకొండ పట్టణంలోని దర్గాపేటకు చెందినవారిగా పోలీసులు గుర్తించారు. దర్గాపేటకు చెందిన గాయత్రమ్మ, ఆమె కుమార్తె అశ్విని, వారి స్నేహితులు పుష్పలత, షేక్‌ హసీనా, అత్తర్‌ మాహీ కలిసి గొల్లపల్లి జలాశయాన్ని సందర్శించేందుకు వెళ్లారు. జలాశయం వద్ద ప్రమాదవశాత్తు ఒకరి తర్వాత ఒకరు నీటిలో మునిగిపోయారు. ఈత రాకపోవడంతో ఐదుగురూ ప్రాణాలు కోల్పోయారు. సమాచారం అందుకున్న స్థానికులు, బంధువులు జలాశయం వద్దకు చేరుకుని మృతదేహాలను బయటకు తీశారు. ఘటనాస్థలికి చేరుకున్న పోలీసులు మృతదేహాలను పోస్టుమార్టం నిమిత్తం ఆసుపత్రికి తరలించారు. కేసు నమోదు చేసి దర్యాప్తు చేపట్టారు.
ఐదుగురు మహిళల మృతిపై ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్‌ కల్యాణ్‌ తీవ్ర విచారం వ్యక్తం చేశారు. మృతుల ఆత్మకు శాంతి చేకూరాలని ప్రార్థిస్తూ, బాధిత కుటుంబాలకు ప్రగాఢ సానుభూతి తెలిపారు. ఘటనకు సంబంధించిన వివరాలను అధికారులను అడిగి తెలుసుకున్నారు. గొల్లపల్లి జలాశయాన్ని సందర్శించేందుకు వెళ్లిన మహిళలు ప్రమాదవశాత్తు నీటిలో పడిపోయారని, మత్స్యకారులు గుర్తించి మృతదేహాలను బయటకు తీశారని అధికారులు వివరించారు.
