నాణ్యతా ప్రమాణాలతో డీఏ-జూగా పనులు పూర్తి చేయాలి
అభివృద్ధి పనులు, ఆశ్రమ పాఠశాల, బాలికల వసతి గృహాన్ని
తనిఖీ చేసిన ఐటీడీఏ పీఓ లెనిన్ వత్సల్ టోప్పో
కాకతీయ, ఏటూరునాగారం : గిరిజన ప్రాంతాల్లో మౌలిక సదుపాయాల అభివృద్ధి, విద్యార్థులకు మెరుగైన వసతి కల్పించేందుకు కేంద్ర ప్రభుత్వం అమలు చేస్తున్న ధర్తి ఆబా జనజాతీయ గ్రామ ఉత్కర్ష్ అభియాన్ (డీఏ-జూగా) పథకం పనులను నాణ్యతా ప్రమాణాలతో వేగవంతంగా పూర్తి చేయాలని ఐటీడీఏ పీఓ లెనిన్ వత్సల్ టోప్పో అధికారులను ఆదేశించారు. బుధవారం గోవిందరావుపేట మండలంలోని కార్లాపల్లి గ్రామంలో పథకం కింద నిర్మిస్తున్న సిబ్బంది క్వార్టర్స్ పనులను పరిశీలించి, కొనసాగుతున్న ప్లాస్టరింగ్ పనుల పురోగతిని అడిగి తెలుసుకున్నారు. నిర్మాణంలో నాణ్యతా లోపాలకు తావులేకుండా నిర్దేశిత ప్రమాణాల ప్రకారం పనులు చేపట్టి నిర్ణీత గడువులో పూర్తి చేయాలని సూచించారు. అనంతరం బాలుర ఆశ్రమ పాఠశాలను సందర్శించి వంటగది, స్టోర్ గదులను తనిఖీ చేశారు. విద్యార్థుల సంఖ్యకు అనుగుణంగా వంట సామగ్రి, గ్యాస్ సిలిండర్లు, పాత్రలు అందుబాటులో ఉండాలని, నిర్ణీత మెనూ ప్రకారం నాణ్యమైన భోజనం అందించాలని ఆదేశించారు. పదో తరగతి విద్యార్థులతో మాట్లాడి చదువు, పరీక్షల సన్నద్ధత, అభ్యసన సామర్థ్యాలను పరిశీలించారు. పాఠశాలలో విద్యార్థులకు కల్పిస్తున్న 21 రకాల సదుపాయాల అమలు, ఎఫ్ఆర్ఎస్ యాప్ ద్వారా హాజరు నమోదు ప్రక్రియను తనిఖీ చేశారు. విద్యార్థుల్లో చదవడం, రాయడం వంటి సామర్థ్యాలను పెంపొందించేందుకు ఉపాధ్యాయులు ప్రత్యేక శ్రద్ధ చూపాలని, పాఠశాలలో గుర్తించిన మౌలిక సదుపాయాల సమస్యలను పరిష్కరించాలని సూచించారు. అనంతరం చల్వాయి బాలికల పోస్ట్మెట్రిక్ వసతి గృహాన్ని సందర్శించి డీఏ-జూగా పథకం కింద నిర్మిస్తున్న 20 యూనిట్ల పనులను పరిశీలించారు. ఇందులో 10 టాయిలెట్లు, 10 బాత్రూమ్లు ఏర్పాటు చేస్తున్నట్లు అధికారులు వివరించగా, బాలికలకు మెరుగైన పారిశుధ్య సదుపాయాలు అందుబాటులోకి వచ్చేలా నిర్మాణ పనులను నాణ్యతతో పూర్తి చేయాలని ఆదేశించారు. గిరిజన ప్రాంతాల్లో మౌలిక సదుపాయాల అభివృద్ధి, విద్యార్థులకు నాణ్యమైన విద్య, మెరుగైన వసతి, పారిశుధ్య సౌకర్యాల కల్పనకు డీఏ-జూగా పథకం కీలకమని, ప్రభుత్వ లక్ష్యాలకు అనుగుణంగా అధికారులు సమన్వయంతో పనిచేస్తూ పనులను వేగవంతంగా పూర్తి చేయాలని పీఓ స్పష్టం చేశారు.


