ధాన్యం కొనుగోలులో జాప్యం చెయ్యద్దు
రైతుల వివరాలను వెంటనే ట్యాబ్లో నమోదు చేయాలి
కొనుగోలు కేంద్రం పరిశీలించిన జిల్లా కలెక్టర్ స్నేహ శబరీష్
కాకతీయ, హనుమకొండ : ధాన్యం కొనుగోలు కేంద్రాల్లో జాప్యం లేకుండా, పారదర్శకంగా కొనుగోలు కొనసాగించాలని అధికారులు, నిర్వాహకులకు హనుమకొండ జిల్లా కలెక్టర్ స్నేహ శబరీష్ ఆదేశాలు జారీ చేశారు. గురువారం శాయంపేట మండలం పత్తిపాక గ్రామంలోని వరి ధాన్యం కొనుగోలు కేంద్రాన్ని కలెక్టర్ ప్రత్యక్షంగా పరిశీలించారు. కేంద్రంలో పేరుకుపోయిన ధాన్యం, క్వింటాల వారీగా కొనుగోలు వివరాలు, రోజువారీ లావాదేవీలు, టోకెన్ల జారీ మొదలైన అంశాలపై కలెక్టర్ సమగ్రంగా విచారణ నిర్వహించారు. రైతుల వివరాలను నమోదు చేసే ట్యాబ్ ఆరు రోజులుగా పనిచేయకపోయినా దాన్ని బాగు చేయించలేదని కలెక్టర్ అధికారులను ప్రశ్నించారు. ట్యాబ్ ఎంట్రీ లేకపోతే రైతులకు డబ్బులు ఖాతాల్లో జమ కావడం ఆలస్యమవుతుందని, ఇలాంటి నిర్లక్ష్యం అసహ్యం కాదని స్పష్టం చేశారు. రైతుల కోసం టెంట్, తాగునీటి వంటి మౌలిక సదుపాయాలు కూడా అందుబాటులో లేవని గుర్తించిన కలెక్టర్ నిర్వాహకులను ప్రశ్నించారు. అక్కడే ఉన్న రైతుల వివరాలను ట్యాబ్లో నమోదు చేస్తున్న విధానాన్ని ప్రత్యక్షంగా పరిశీలించారు. కొనుగోలు కేంద్రంలో జరిగిన నిర్లక్ష్యం, ట్యాబ్ ఎంట్రీల ఆలస్యం నేపథ్యంలో ఏపీఎం, కొనుగోలు కేంద్రం ఇన్చార్జికి షోకాజ్ నోటీసులు ఇవ్వాలని కలెక్టర్ ఆదేశించారు. తదుపరి కలెక్టర్ స్నేహ శబరీష్ మాట్లాడుతూ.. రైతుల వివరాలను నమోదు చేసే ట్యాబ్ను వెంటనే మరమ్మతు చేయాలన్నారు. ధాన్యం విక్రయించిన వెంటనే ఎంట్రీలు చేయాలని సూచించారు. ఎంపీడీవో, ఏపీఎం నియమితంగా కొనుగోలు కేంద్రంలో ఉండి పర్యవేక్షణ చేయాలని ఆదేశించారు. రైతులకు అసౌకర్యం లేకుండా టెంట్, తాగునీరు తదితర సదుపాయాలు కల్పించాలని సూచించారు. ధాన్యం కొనుగోలు ప్రక్రియ ఎక్కడా నిలిచిపోకుండా అధికారులు సమన్వయం చేసుకోవాలని సూచించారు. ఈ కార్యక్రమంలో తహసిల్దార్ ప్రవీణ్ కుమార్, ఎంపీడీవో ఫణి చంద్ర, ఏపీఎం వేణు, ఇతర అధికారులు, స్థానిక రైతులు పాల్గొన్నారు.
