భక్తులకు మెరుగైన వైద్య సేవలు అందించాలి

భక్తులకు మెరుగైన వైద్య సేవలు అందించాలి
డైరెక్టర్ ఆఫ్ పబ్లిక్ హెల్త్ అండ్ ఫ్యామిలీ వెల్ఫేర్ రవీందర్ నాయక్
మేడారం జాత‌ర‌లో వైద్య ఆరోగ్య శాఖ ఏర్పాట్ల‌పై స‌మీక్ష‌

కాకతీయ, ములుగు ప్రతినిధి : రాబోయే శ్రీ సమ్మక్క–సారలమ్మ జాతర–2026లో భక్తులకు మెరుగైన వైద్య సేవలు అందించడానికి ముందస్తు చర్యలు వేగవంతమయ్యాయి. ఈ నేపథ్యంలో ములుగు జిల్లా కలెక్టర్‌ కార్యాలయంలో ఏర్పాటు చేసిన సమన్వయ కమిటీ మరియు ఉచిత వైద్య శిబిరాల ముందస్తు ప్రణాళికలపై జరిగిన సమీక్షా సమావేశంలో డైరెక్టర్ ఆఫ్ పబ్లిక్ హెల్త్ అండ్ ఫ్యామిలీ వెల్ఫేర్ డా.రవీందర్ నాయక్ కీలక సూచనలు చేశారు. ఈ సందర్భంగా ఆయన మాట్లాడుతూ జాతరకు వచ్చే లక్షలాది మంది భక్తులకు ఎటువంటి వైద్య ఇబ్బందులు రాకుండా పటిష్టమైన వైద్య వ్యవస్థను రూపొందిస్తున్నామని తెలిపారు. జాతర కాలంలో పనిచేసే వైద్య సిబ్బంది ఒత్తిడికి గురికాకుండా, సేవలను సమర్థవంతంగా నిర్వహించేందుకు డ్యూటీని ఓన్ చేసుకుని పనిచేయాలని సూచించారు. డిసెంబర్ 25–31రోజుకు 3 ఉచిత వైద్య శిబిరాలు,జనవరి 1–18 రోజుకు 10 శిబిరాలు,జనవరి 19–27 రోజుకు 20 శిబిరాలు,జనవరి 28–31 రోజుకు 72 శిబిరాలు,ఫిబ్రవరి 1–10 జాతర అనంతర వైద్య శిబిరాలు ఏర్పాటు చేయనున్నారు. 340 రకాల మందులు, శస్త్రచికిత్స పరికరాలు భద్రపరచడం,19, 108 అంబులెన్సులు, 40 బైక్ అంబులెన్సులు వినియోగించనున్నారు. నిపుణ డాక్టర్లను ఎంజీఎం వరంగల్, భూపాలపల్లి, ములుగు ప్రభుత్వ ఆస్పత్రుల నుంచి డిప్యూట్ చేయనున్నట్లు తెలిపారు. అలాగే భక్తుల రద్దీ, వ్యాధి పర్యవేక్షణ, ఔషధ నిల్వలు, ఇంటర్-డిపార్ట్మెంటల్ సమన్వయం వంటి అంశాల్లో సంబంధిత శాఖలు సంయుక్తంగా పని చేయాలని సూచించారు. డిప్యూట్ చేయబోయే సిబ్బందికి ముందస్తుగా జూమ్ మీటింగ్‌లు నిర్వహించాలని జిల్లా అధికారులను ఆదేశించారు. ఈ సమావేశంలో డాక్టర్ గోపాల్ రావు, డాక్టర్ అప్పయ్య, డాక్టర్ సాంబశివరావు, డాక్టర్ మధుసూదన్, డాక్టర్ మల్లికార్జున్, డాక్టర్ రవి రాథోడ్, డాక్టర్ ప్రసాద్, జిల్లా ఉప వైద్య ఆరోగ్యశాఖాధికారులు డాక్టర్ విపిన్ కుమార్, డాక్టర్ క్రాంతి కుమార్, జిల్లా ప్రోగ్రామ్ అధికారులు డాక్టర్ పవన్ కుమార్, డాక్టర్ శ్రీకాంత్, అలాగే దుర్గారావు, ప్రసాద్, వెంకటపతి రాజు, మానిటరింగ్ సూపర్వైజర్లు వెంకట్ రెడ్డి, సురేష్ బాబు, భూపాల్ రెడ్డి, ప్రాథమిక ఆరోగ్య కేంద్రాల మెడికల్ ఆఫీసర్లు, ఆర్బిఎస్కే డాక్టర్లు తదితరులు పాల్గొన్నారు.