ఉత్కంఠకు తెర

ఉత్కంఠకు తెర
ములుగు మున్సిపల్ చైర్మన్‌గా చంద్రకళ
సీనియార్టీకి గౌరవం… మంత్రి సీతక్క నిర్ణయంతో పీఠంపైకి చంద్రకళ
ఉత్కంఠ పోరులో ఆశావహులను అధిగమించి చైర్మన్‌గా ఎన్నిక
30 ఏళ్ల రాజకీయ ప్రస్థానానికి లభించిన అరుదైన గుర్తింపు
వైస్ చైర్మన్‌గా రియాజ్ మీర్జా ప్రమాణ స్వీకారం

కాకతీయ, ములుగు ప్రతినిధి : మున్సిపల్ రాజకీయాల్లో రోజుల తరబడి కొనసాగిన ఉత్కంఠకు ఎట్టకేలకు తెరపడింది. తీవ్ర పోటీ, అంతర్గత చర్చలు, సమీకరణాల మధ్య చింతనిప్పుల చంద్రకళ మున్సిపల్ చైర్మన్‌గా ఎన్నికయ్యారు. పార్టీలో పలువురు ఆశావహులు పోటీలో ఉన్నప్పటికీ, చివరకు సీనియార్టీ, అనుభవానికి ప్రాధాన్యం ఇస్తూ చంద్రకళను చైర్మన్ పీఠానికి ఎంపిక చేయడం రాజకీయంగా ప్రాధాన్యం సంతరించుకుంది. చైర్మన్ పదవి కోసం పార్టీలో తీవ్ర పోటీ నెలకొంది. కొత్తవారికి అవకాశం ఇవ్వాలన్న వాదన ఒకవైపు ఉండగా, పార్టీ కోసం ఎన్నో ఏళ్లుగా కృషి చేసిన సీనియర్ నాయకుడికి అవకాశం ఇవ్వాలన్న అభిప్రాయం మరోవైపు బలంగా వినిపించింది. ఈ నేపథ్యంలో మంత్రి సీతక్క కీలకంగా వ్యవహరించి, సీనియార్టీ, విశ్వసనీయత, పార్టీకి చేసిన సేవలను పరిగణనలోకి తీసుకుని చంద్రకళ పేరును ఖరారు చేసినట్లు పార్టీ వర్గాలు తెలిపాయి. చింతనిప్పుల చంద్రకళ గత 30 ఏళ్లుగా రాజకీయాల్లో చురుకుగా కొనసాగుతూ పార్టీ బలోపేతానికి కృషి చేశారు. స్థానికంగా ప్రజలతో సన్నిహిత సంబంధాలు, వివాదరహిత నాయకురాలిగా గుర్తింపు, ఎన్నికల్లో పార్టీ విజయంలో కీలక పాత్ర పోషించడం వంటి అంశాలు ఆమెకు ఈ పదవి దక్కడంలో కీలకంగా మారాయి. ఈ చైర్మన్ పదవి ఆమె రాజకీయ జీవితంలో ఒక కీలక మైలురాయిగా నిలిచింది.

వైస్ చైర్మన్‌గా రియాజ్ మీర్జా

చైర్మన్ ఎన్నిక అనంతరం జరిగిన ప్రక్రియలో రియాజ్ మీర్జా మున్సిపల్ వైస్ చైర్మన్‌గా ప్రమాణ స్వీకారం చేశారు. కొత్తగా బాధ్యతలు స్వీకరించిన చైర్మన్, వైస్ చైర్మన్ పట్టణ అభివృద్ధికి కట్టుబడి పనిచేస్తామని తెలిపారు. ఉత్కంఠభరితంగా సాగిన మున్సిపల్ చైర్మన్ ఎన్నికలో సీనియార్టీకి ప్రాధాన్యం ఇస్తూ చింతనిప్పుల చంద్రకళను ఎంపిక చేయడం పార్టీలోనూ, స్థానిక రాజకీయాల్లోనూ చర్చనీయాంశంగా మారింది.