దేవుడి సొమ్ముకే ఎసరు
గుడివాడలో ఘరానా మోసం వెలుగులోకి
దేవడి కిరీటం బ్యాంకులో తాకట్టు..
రూ.70 లక్షల కిరీటం.. రూ.35 లక్షలకు తాకట్టు
డబ్బులను సొంత వ్యాపారాలకు వాడుకున్న కమిటీ సభ్యులు
దాత మాటూరు సుబ్బారావు ఆవేదన
కాకతీయ, ఏపీ బ్యూరో : భక్తులు ఎంతో భక్తిశ్రద్ధలతో వేంకటేశ్వరస్వామికి సమర్పించిన బంగారు కిరీటాన్ని తాకట్టు పెట్టి, ఆ వచ్చిన సొమ్ముతో ఆలయ కమిటీ సభ్యులు సొంత వ్యాపారాలు చేసుకుంటున్న ఘోర అవినీతి ఉదంతం వెలుగులోకి వచ్చిందని దాత మాటూరు సుబ్బారావు తీవ్ర ఆవేదన వ్యక్తం చేశారు. గుడివాడలోని ప్రసిద్ధ వేంకటేశ్వరస్వామి ఆలయంలో పాలక వర్గ సభ్యులు భక్తుల నమ్మకాన్ని నట్టేట ముంచుతూ ఈ ఘరానా మోసానికి తెరలేపారు. ఈ దారుణ సంఘటనకు సంబంధించి తీవ్ర ఆగ్రహానికి గురైన దాతలు, స్థానిక భక్తులు గురువారం స్థానిక పోలీస్ స్టేషన్లో ఆలయ కమిటీ సభ్యులపై అధికారికంగా ఫిర్యాదు చేశారు. గత 2025 లో తానే స్వయంగా ఎంతో పవిత్రంగా, భక్తితో రూ.70 లక్షల భారీ వ్యయంతో స్వామివారికి ఈ బంగారు కిరీటాన్ని చేయించి సమర్పించినట్లు దాత వివరించారు. దేవుడి ఆభరణాన్ని దేవుడికే అలంకరించకుండా సొంత లాభాల కోసం వాడుకోవడంపై భక్తులు తీవ్ర ఆగ్రహం వ్యక్తం చేస్తున్నారు.
పాలక వర్గం బుకాయింపులు
ఆలయానికి వచ్చే భక్తులు, దాతలు స్వామివారికి కిరీటాన్ని ఎందుకు అలంకరించడం లేదని నిలదీసినప్పుడల్లా పాలక వర్గ సభ్యులు రకరకాలుగా బుకాయించారు. కిరీటాన్ని భద్రతా కారణాల దృష్ట్యా బ్యాంకు లాకర్లో చాలా సురక్షితంగా ఉంచామని అబద్ధాలు చెబుతూ ఇన్నాళ్లూ కాలయాపన చేశారని భక్తులు ఆగ్రహం వ్యక్తం చేశారు. అయితే అనుమానం వచ్చి గట్టిగా నిలదీయడంతో అసలు విషయం బయటపడింది. ఆ పవిత్రమైన బంగారు కిరీటాన్ని కేవలం రూ.38 లక్షల మొత్తానికి బ్యాంకులో తాకట్టు పెట్టేసినట్లు విచారణలో తేలింది. ఆలయానికి వచ్చే నిధులు, ఆభరణాల రక్షణపై కమిటీ నిర్లక్ష్యంగా వ్యవహరించడమే కాకుండా, దాతల నమ్మకాన్ని వమ్ము చేస్తూ ఈ విధంగా దోపిడీకి పాల్పడటం స్థానికంగా పెద్ద దుమారం రేపింది.
సొంత వ్యాపారాలకు నిధులు
భక్తులు భగవంతుడికి సమర్పించిన కానుకలను, ఆభరణాలను అడ్డం పెట్టుకుని ఆలయ కమిటీ సభ్యులు అక్రమంగా వ్యాపారాలు చేస్తున్నారని దాతలు ఆరోపించారు. తాకట్టు ద్వారా వచ్చిన రూ.38 లక్షల నగదును కమిటీ సభ్యులు తమ సొంత వ్యాపార అవసరాలకు పెట్టుబడిగా మళ్లించారని ఆధారాలతో సహా బయటపెట్టారు. దేవుడి సొమ్మును కాజేసి, వ్యాపారాలు చేస్తూ భక్తుల సెంటిమెంట్లతో ఆడుకుంటున్న ఇలాంటి వారిపై కఠిన చర్యలు తీసుకోవాలని డిమాండ్ చేశారు. దేవాలయాల పవిత్రతను దెబ్బతీస్తూ, దాతలను మోసం చేసిన పాలక వర్గ సభ్యులపై తక్షణమే దేవాదాయ శాఖ అధికారులు, పోలీసులు స్పందించి చట్టపరమైన చర్యలు తీసుకోవాలని స్థానికులు కోరుతున్నారు. తాకట్టులో ఉన్న స్వామివారి బంగారు కిరీటాన్ని వెంటనే రికవరీ చేసి, ఆలయానికి అప్పగించాలని డిమాండ్ చేశారు. ఈ ఘరానా మోసానికి కారణమైన కమిటీ సభ్యులందరినీ పదవుల నుంచి తొలగించి, వారిపై కఠినమైన క్రిమినల్ కేసులు నమోదు చేయాలని దాత మాటూరు సుబ్బారావుతో పాటు స్థానిక భక్తులు పోలీస్ స్టేషన్ ఎదుట డిమాండ్ చేశారు.
