రాయపర్తిలో 10,097 ఎస్ఐఆర్ నోటీసులు
97 శాతం పూర్తయిన సవరణ ప్రక్రియ
ఇంకా స్పందించని 286 మంది ఓటర్లు
అక్టోబర్ 7 లోపు ఆధారాలు సమర్పించాలి
నిర్లక్ష్యం చేస్తే అంతే సంగతి…ఓటు హక్కు గల్లంతు
రాయపర్తి తహసిల్దారు ముల్కనూరి శ్రీనివాస్
కాకతీయ, రాయపర్తి : మండల వ్యాప్తంగా జరుగుతున్న ప్రత్యేక ఓటర్ల వివరాల సవరణ(ఎస్ఐఆర్) ప్రక్రియ ముమ్మరంగా సాగుతోందని సహాయక ఓటర్ల నమోదు అధికారి( ఏఈఆర్ఓ),తహసిల్దారు ముల్కనూరి శ్రీనివాస్ తెలిపారు. ఉత్తరం కాకతీయ ప్రతినిధి ప్రత్యేకంగా సంప్రదించగా మంగళవారం ఆయన కీలక విషయాలను వెల్లడించారు. సహాయక ఓటర్ల నమోదు అధికారి(ఏఈఆరోఓ)గా తహసిల్దార్,అదనపు ఏఈఆర్ఓ ఎంపీడీవో పాక శ్రీనివాసులు పర్యవేక్షణలో ఈ సవరణ ప్రక్రియ కొనసాగుతుందని అన్నారు.పారదర్శకమైన,తప్పులు లేని ఓటర్ల జాబితా రూపకల్పనకు రెవెన్యూ,పంచాయతీరాజ్ యంత్రాంగం నిరంతరం శ్రమిస్తుందని ఆయన స్పష్టం చేశారు.మండలంలో మొత్తం 46,079 మంది ఓటర్లు ఉన్నారు.ఇందులో జారీ చేసిన 10,097 నోటీసులకు గాను ఇప్పటివరకు 9,811 దరఖాస్తులు (97శాతం) పూర్తిస్థాయిలో పరిష్కరించినట్లు పేర్కొన్నారు.తహసిల్దారు పరిధిలో 5,371 నోటీసులకు గాను 5,160 మంది ఓటర్లు తమ సరైన ఆధారాలతో స్పందించారు.ఎంపీడీఓ పరిధిలో 4,726 నోటీసులకు గాను 4,651 మంది వెంటనే స్పందించి వివరాలను సరి చేసుకున్నారు.
ఇంకా స్పందించని 286 మంది ఓటర్లు
మండల వ్యాప్తంగా అధికారులు నోటీసులు ఇచ్చినప్పటికీ..ఇంకా 286 మంది ఓటర్లు ఎలాంటి ఆధారాలు సమర్పించలేదని తహసిల్దారు తెలిపారు. నోటీసులు అందుకొని స్పందించని వారి ఇళ్లకు బిఎల్ఓలు నిరంతరం వెళ్తున్నారు.అక్టోబర్ 7లోగా సంబధిత బిఎల్ఓని గానీ,తహసిల్దారు కార్యాలయంలో గాని ఆధారాలు సమర్పించాలి.నిర్దేశిత గడువులోగా స్పందించకపోతే ఓటు హక్కు గల్లంతయ్యే ప్రమాదం ఉందని తహసిల్దారు హెచ్చరించారు.
