కేసీఆర్‌ నాయకత్వమే రాష్ట్రానికి శ్రీరామరక్ష
ప్ర‌జ‌ల‌కిచ్చిన హామీల అమలులో కాంగ్రెస్ ప్రభుత్వం విఫ‌లం
రైతులు ఎదుర్కొంటున్న సమస్యలు పరిష్కరించాలి
మాజీ ఎమ్మెల్యే గండ్ర వెంకట రమణారెడ్డి
కాకతీయ, చిట్యాల : కేసీఆర్‌ నాయకత్వమే రాష్ట్రానికి శ్రీరామరక్ష అని మాజీ ఎమ్మెల్యే గండ్ర వెంకట రమణారెడ్డి అన్నారు. కేసీఆర్‌ పాలనలో రైతులు, ప్రజల సంక్షేమానికి అమలైన కార్యక్రమాలను ప్రజలు ఇప్పటికీ గుర్తు చేసుకుంటున్నారని తెలిపారు. ప్రస్తుత సమస్యలను అర్థం చేసుకుని పలువురు తిరిగి బీఆర్‌ఎస్‌లో చేరుతున్నారని పేర్కొన్నారు. భూపాల‌ప‌ల్లి జిల్లా చిట్యాల మండలం వెంచరామి గ్రామపంచాయతీ పరిధిలో కాంగ్రెస్‌కు చెందిన పలువురు నాయకులు, కార్యకర్తలు ఆ పార్టీకి రాజీనామా చేసి బీఆర్‌ఎస్‌లో చేరారు. స్థానిక సర్పంచ్‌ శ్రీమతి కాసురమా కుమార్‌ నాయకత్వంలో, మండల నాయకత్వం, స్థానిక నాయకుల సమక్షంలో జరిగిన కార్యక్రమంలో మాజీ ఎమ్మెల్యే గండ్ర వెంకట రమణారెడ్డి వారికి గులాబీ కండువాలు కప్పి పార్టీలోకి ఆహ్వానించారు. ప్రస్తుతం రైతులు విద్యుత్‌ సరఫరా, ఎరువుల లభ్యత తదితర సమస్యలను ఎదుర్కొంటున్నారని గండ్ర వెంకట రమణారెడ్డి అన్నారు. ఎన్నికల సమయంలో ఇచ్చిన హామీల అమలుపై ప్రజల్లో ప్రశ్నలు ఉన్నాయని, వాటిని అమలు చేసి సమాధానం చెప్పాల్సిన బాధ్యత ప్రభుత్వంపై ఉందన్నారు. మాటలు చెప్పడం కాదని, ఇచ్చిన హామీలను చేసి చూపించాలని అన్నారు. ఇటీవల ముఖ్యమంత్రి సిరిసిల్ల పర్యటనలో చేసిన ప్రసంగాన్ని ప్రస్తావిస్తూ, ప్రభుత్వం ఏర్పడి దాదాపు మూడేళ్లు పూర్తవుతున్న నేపథ్యంలో గత ప్రభుత్వంపై విమర్శల కంటే ప్రజలకు ఇచ్చిన హామీల అమలుపై దృష్టి పెట్టాలని సూచించారు. ప్రజలు కోరుకున్న సంక్షేమం, రైతులు కోరుతున్న మద్దతు, ఆడబిడ్డలకు ఇచ్చిన హామీలను అమలు చేసి ప్రజల విశ్వాసాన్ని నిలబెట్టుకోవాలని అన్నారు.
బీఆర్‌ఎస్‌లో చేరికలు
వెంచరామి నుంచి పెద్ద సంఖ్యలో నాయకులు, కార్యకర్తలు బీఆర్‌ఎస్‌లో చేరడం పట్ల గండ్ర వెంకట రమణారెడ్డి హర్షం వ్యక్తం చేశారు. వారి రాకతో చిట్యాల మండలంలో పార్టీ మరింత బలోపేతమవుతుందని అన్నారు. రాబోయే రోజుల్లో నియోజకవర్గంలో, రాష్ట్రంలో కేసీఆర్‌ నాయకత్వానికి ప్రజల నుంచి మరింత మద్దతు లభిస్తుందని ఆశాభావం వ్యక్తం చేశారు. బీఆర్‌ఎస్‌లో చేరిన ప్రతి ఒక్కరినీ సాదరంగా స్వాగతిస్తున్నామని, పార్టీ బలోపేతానికి అందరూ కలిసికట్టుగా పనిచేయాలని గండ్ర వెంకట రమణారెడ్డి పిలుపునిచ్చారు. ఈ సందర్భంగా జక్కే వెంకటేశం, మోరే ధర్మరాజు, కళ్లేపల్లి సదయ్య, చేటుకూరి అశోక్‌, గుర్రం అయిలయ్య, యూత్‌ ఉపాధ్యక్షుడు తిప్పన శివ, ఆశాడపు మల్లయ్య, పరికిపండ్ల సమ్మయ్య, పరికిపండ్ల సాగర్‌, పరికిపండ్ల సంతోష్‌ తదితరులు బీఆర్‌ఎస్‌లో చేరారు.
