ఎమ్మెల్సీ ఎన్నికల్లో బీఆర్‌ఎస్‌ సత్తా చాటాలి
ప్రతి ఓటరును నేరుగా కలిసి పార్టీ అభ్యర్థికి మద్దతు కోరాలి
పట్టభద్రుల సమస్యలు, ప్రభుత్వ వైఫల్యాలను ప్రజల్లోకి తీసుకెళ్లాలి
పరకాల మాజీ ఎమ్మెల్యే చల్లా ధర్మారెడ్డి
కాకతీయ, హనుమకొండ : వరంగల్–ఖమ్మం–నల్గొండ పట్టభద్రుల ఎమ్మెల్సీ ఎన్నికల్లో బీఆర్‌ఎస్‌ అభ్యర్థి గెలుపే లక్ష్యంగా ప్రతి నాయకుడు, కార్యకర్త క్షేత్రస్థాయిలో సమష్టిగా పనిచేయాలని మాజీ ఎమ్మెల్యే చల్లా ధర్మారెడ్డి పిలుపునిచ్చారు. గురువారం హనుమకొండలోని తన నివాసంలో పరకాల నియోజకవర్గానికి చెందిన పార్టీ సీనియర్‌, యువజన నాయకులతో సమావేశమయ్యారు. ఈ సందర్భంగా ఎన్నికలపై చర్చిస్తూ కాంగ్రెస్ ప్రభుత్వ వైఫల్యాలను ప్రజల్లోకి తీసుకెళ్లడంతోపాటు బీఆర్‌ఎస్‌ ప్రభుత్వ హయాంలో పట్టభద్రులు, యువత, ఉద్యోగుల కోసం చేపట్టిన కార్యక్రమాలను వివరించాలని సూచించారు. పట్టభద్ర ఓటర్ల నమోదుపై ప్రత్యేక దృష్టి సారించి ప్రతి ఓటరును నేరుగా కలిసి పార్టీ అభ్యర్థికి మద్దతు కోరాలన్నారు. ప్రతి మండలం, గ్రామం, పట్టణంలో సమన్వయంతో పనిచేసేలా కార్యాచరణ రూపొందించుకోవాలని సూచించారు. ఎన్నికలను ప్రతిష్ఠాత్మకంగా తీసుకుని ఐక్యంగా పనిచేయాలని పిలుపునిచ్చారు. ఎన్నికల నియోజకవర్గ బాధ్యుడిగా పరకాల మండల సీనియర్‌ నాయకుడు నేతాని శ్రీనివాస్‌రెడ్డిని నియమించినట్లు తెలిపారు. కార్యక్రమంలో పరకాల పట్టణం, పరకాల, నడికుడ, ఆత్మకూరు, దామెర, గీసుగొండ, జీడబ్ల్యూఎంసీ 15, 16, 17 డివిజన్ల నాయకులు, యువజన నాయకులు పాల్గొన్నారు.
