విద్యార్థుల్లో ఓటు హక్కుపై అవగాహన పెంచాలి
ములుగు ఆర్డీవో కృష్ణవేణి
జిల్లా స్థాయిలో వ్యాసరచన, క్విజ్ పోటీలు
కాకతీయ, ములుగు : ప్రజాస్వామ్య వ్యవస్థలో ఓటు హక్కు ప్రాధాన్యత, ఎన్నికల ప్రక్రియపై ప్రతి విద్యార్థికి అవగాహన ఉండాలని ములుగు ఆర్డీవో కృష్ణవేణి సూచించారు. భారత ఎన్నికల సంఘం ఆదేశాల మేరకు ఎలక్టోరల్ లిటరసీ క్లబ్ల ఆధ్వర్యంలో బుధవారం ములుగు ఆర్డీవో కార్యాలయ సమావేశ మందిరంలో జిల్లా స్థాయి వ్యాసరచన, క్విజ్ పోటీలు నిర్వహించారు. ములుగు అసెంబ్లీ నియోజకవర్గ పరిధిలోని 10 మండలాల పాఠశాలలు, కళాశాలలకు చెందిన విద్యార్థులు ఈ పోటీల్లో పాల్గొన్నారు. స్వచ్ఛమైన ఓటరు జాబితా ప్రాముఖ్యత, ఓటు హక్కు ఆవశ్యకతపై వ్యాసరచన పోటీలు నిర్వహించగా, ఓటరు జాబితా తయారీ, సవరణలు, ఈవీఎంలు, వీవీప్యాట్, పోలింగ్ ప్రక్రియ, ఓట్ల లెక్కింపు అంశాలపై క్విజ్ పోటీలు నిర్వహించి విద్యార్థుల పరిజ్ఞానాన్ని పరీక్షించారు. బాధ్యతాయుత పౌరులుగా ఎదగడంతో పాటు ప్రజాస్వామ్య ప్రక్రియలో చురుకైన భాగస్వాములు కావడానికి ఇలాంటి కార్యక్రమాలు దోహదపడతాయని ఆర్డీవో తెలిపారు. పోటీల్లో ఉత్తమ ప్రతిభ కనబరిచిన విద్యార్థులకు అధికారులు బహుమతులు, మెరిట్ సర్టిఫికెట్లు అందజేశారు. పాఠశాలలు, కళాశాలల్లో ఎలక్టోరల్ లిటరసీ క్లబ్ల ద్వారా ఎన్నికల అవగాహన కార్యక్రమాలను నిరంతరం నిర్వహించాలని కృష్ణవేణి సూచించారు. ఈ కార్యక్రమంలో తహసీల్దార్ విజయభాస్కర్, మండల విద్యాధికారి వజ్జ తిరుపతి, డిప్యూటీ తహసీల్దార్ నితీష్, ఎన్నికల అధికారులు, క్లబ్ల సమన్వయకర్తలు, ఉపాధ్యాయులు, విద్యార్థులు పాల్గొన్నారు.

