నాలుగేళ్ల చిన్నారికి లైంగిక వేధింపులు?
వర్ధన్నపేట మండలంలో ఘటన
ఆలస్యంగా సోమ‌వారం వెలుగులోకి
వర్ధన్నపేట పీఎస్‌లో బాధితురాలి కుటుంబ స‌భ్యుల ఫిర్యాదు
కాకతీయ, వరంగల్ ప్రతినిధి : వరంగల్ జిల్లా వర్ధన్నపేట మండలంలో నాలుగేళ్ల బాలికపై లైంగిక వేధింపులకు పాల్పడ్డారనే ఆరోపణలు కలకలం రేపుతున్నాయి. బాధిత కుటుంబం ఫిర్యాదు మేరకు వర్ధన్నపేట పోలీసులు పోక్సో చట్టం కింద కేసు నమోదు చేసిన‌ట్లు స‌మాచారం. ఘటన ఆలస్యంగా వెలుగులోకి రావడంతో పాటు కేసును ప్రభావితం చేసే ప్రయత్నాలు జరుగుతున్నాయన్న ఆరోపణలు స్థానికంగా చర్చనీయాంశమయ్యాయి. ఇదే విష‌యంపై వర్ధన్నపేట సీఐ, ఎస్ఐల‌కు కాకతీయ ప్రతినిధి ప‌లుమార్లు ఫోన్‌లో వివ‌ర‌ణ తీసుకునేందుకు ప్ర‌య‌త్నం చేయ‌గా అందుబాటులోకి రాలేదు. విశ్వ‌స‌నీయంగా తెలిసిన స‌మాచారం ప్ర‌కారం.. వర్ధన్నపేట మండ‌లంలోని ఓ గ్రామానికి చెందిన నాలుగేళ్ల చిన్నారిపై 50 ఏళ్ల ప్ర‌భుత్వ ఉపాధ్యాయుడు లైంగిక వేధింపులకు పాల్ప‌డిన‌ట్లుగా తెలుస్తోంది. ఆదివారం జ‌రిగిన ఈఘ‌ట‌న సోమ‌వారం ఆలస్యంగా వెలుగులోకి వ‌స్తోంది. ఈ మేరకు సోమ‌వారం వర్ధన్నపేట పోలీస్ స్టేష‌న్‌లో బాధిత బాలిక త‌ల్లి ఫిర్యాదు చేయ‌గా.. కేసు నమోదు చేసిన‌ట్లుగా తెలుస్తోంది. బాలిక‌ను వైద్య ప‌రీక్ష‌ల నిమిత్తం సీకేఎం ఆస్ప‌త్రికి సైతం త‌ర‌లించిన‌ట్లు స‌మాచారం.
ఘటన ఆలస్యంగా వెలుగులోకి రావడంతో కేసును నీరుగార్చేందుకు ప్రయత్నాలు జరుగుతున్న‌ట్లుగా ఆరోపణలు వెల్లువెత్తుతున్నాయి.
