అర్ధరాత్రి మళ్లీ పెద్ది విగ్రహం తొలగింపు
బీఆర్ఎస్ శ్రేణుల్లో తీవ్ర ఆగ్రహం..నర్సంపేటలో హైటెన్షన్
ముఖ్య నేతలు, ప్రజాప్రతినిధుల ముందస్తు అరెస్టు
వివిధ పోలీస్ స్టేషన్లకు తరలింపు
ఎమ్మెల్యే దొంతి పుట్టినరోజునే ఘటన
ఓ వైపు ఎమ్మెల్యే బర్త్ డే వేడుకలు..మరో వైపు ఆందోళనలు
నర్సంపేటలో భారీగా పోలీసుల మోహరింపు
కాకతీయ, నర్సంపేట : మాజీ ఎమ్మెల్యే పెద్ది సుదర్శన్రెడ్డి విగ్రహాన్ని సోమవారం అర్ధరాత్రి తర్వాత తొలగించడంతో నర్సంపేటలో హైటెన్షన్ నెలకొంది. నర్సంపేట మెడికల్ కాలేజీకి సమీపంలోని ఓ ప్రైవేటు ల్యాండ్లో ఇటీవల పెద్ది సుదర్శన్రెడ్డి విగ్రహాన్ని బీఆర్ ఎస్ నేతలు, అభిమానుల ఆధ్వర్యంలో విగ్రహాన్ని ఏర్పాటు చేశారు. అయితే విగ్రహ ఏర్పాటుకు ఎలాంటి అనుమతి లేదని పేర్కొంటూ అధికారులు అర్ధరాత్రి తొలగించడం వివాదాస్పదంగా మారింది. విగ్రహం తొలగింపు విషయం తెలుసుకున్న ఉమ్మడి వరంగల్ జిల్లాకు చెందిన బీఆర్ఎస్ ముఖ్య నేతలు పెద్ద సంఖ్యలో నర్సంపేటకు చేరుకునే ప్రయత్నం చేస్తుండగా.. ఎక్కడికక్కడ అరెస్టులు చేపట్టడం గమనార్హం. ఈ ఘటనపై బీఆర్ఎస్ శ్రేణులు తీవ్ర ఆగ్రహంతో రగిలిపోతున్నాయి. ఈ నేపథ్యంలో ఎలాంటి అవాంఛనీయ ఘటనలు చోటుచేసుకోకుండా పోలీసులు భారీగా మోహరించారు. నర్సంపేట పట్టణంతో పాటు పరిసర ప్రాంతాల్లో బందోబస్తు ఏర్పాటు చేశారు.
వివిధ పోలీస్ స్టేషన్లకు తరలింపు
నల్లబెల్లి మండలానికి చెందిన ప్రజాప్రతినిధులను ఆత్మకూరు పోలీస్ స్టేషన్కు తరలించి అక్కడ ఉంచినట్లు సమాచారం. ఇతర మండలాలకు చెందిన సర్పంచులను సమీపంలోని వివిధ పోలీస్ స్టేషన్లకు తరలించినట్లు తెలుస్తోంది. బీఆర్ఎస్ ముఖ్య నాయకులందరూ ఒకే చోట గుమిగూడకుండా పోలీసులు ముందస్తు చర్యలు చేపట్టినట్లు సమాచారం. పెద్ది సుదర్శన్రెడ్డి విగ్రహం తొలగించిన విషయం తెలుసుకున్న బీఆర్ఎస్ కార్యకర్తలు, అభిమానులు నర్సంపేటకు చేరుకునే అవకాశం ఉండటంతో పోలీసులు మరింత అప్రమత్తమయ్యారు. పట్టణంలోని ప్రధాన కూడళ్లతో పాటు మెడికల్ కాలేజీ పరిసరాల్లో నిఘా పెంచారు. పరిస్థితులు ఉద్రిక్తంగా మారకుండా పోలీసు అధికారులు ఎప్పటికప్పుడు పరిస్థితిని పర్యవేక్షిస్తున్నారు.
కాంగ్రెస్లో ఎమ్మెల్యే పుట్టినరోజు సందడి
ఇదే రోజు నర్సంపేట ఎమ్మెల్యే దొంతి మాధవరెడ్డి పుట్టినరోజు కావడంతో కాంగ్రెస్ శ్రేణుల్లో సంబరాలు నెలకొన్నాయి. ఎమ్మెల్యేకు శుభాకాంక్షలు తెలుపుతూ పార్టీ నాయకులు, కార్యకర్తలు పలు కార్యక్రమాలు చేపడుతున్నారు. ఒకవైపు ఎమ్మెల్యే పుట్టినరోజు వేడుకలతో కాంగ్రెస్ శ్రేణుల్లో సందడి కనిపిస్తుండగా, మరోవైపు మాజీ ఎమ్మెల్యే పెద్ది సుదర్శన్రెడ్డి విగ్రహం తొలగింపు బీఆర్ఎస్ శ్రేణుల్లో ఆగ్రహం రేకెత్తిస్తోంది. విగ్రహం ఏ కారణాలతో తొలగించారన్నది ప్రస్తుతం చర్చనీయాంశంగా మారింది. ఈ వ్యవహారం నర్సంపేటలో రాజకీయంగా దుమారం రేపుతోంది. విగ్రహం తొలగింపును బీఆర్ఎస్ శ్రేణులు తీవ్రంగా వ్యతిరేకిస్తున్నారు.
