హాఫ్ మారథాన్‌ నేపథ్యంలో ట్రాఫిక్ ఆంక్షలు
కాకతీయ, వరంగల్ బ్యూరో : హాఫ్ మారథాన్‌ పరుగు నిర్వహణ నేపథ్యంలో ఈ నెల 17న వరంగల్, హనుమకొండ, కాజీపేట ప్రాంతాల్లో ఉదయం 4 నుంచి 10 గంటల వరకు ట్రాఫిక్ ఆంక్షలు అమలు చేయనున్నట్లు వరంగల్ పోలీస్ కమిషనర్ ఎన్. శ్వేత తెలిపారు. హైదరాబాద్‌ నుంచి హనుమకొండకు వచ్చే వాహనాలు ఫాతిమా సెంటర్‌, మదర్ థెరిసా సెంటర్‌, వడ్డేపల్లి చర్చి, తులసి బార్‌, కేయూసీ జంక్షన్‌, నయీంనగర్‌, సీపీఓ జంక్షన్‌ మీదుగా హనుమకొండ బస్టాండ్‌కు చేరుకోవాలి. హనుమకొండ నుంచి హైదరాబాద్‌కు వెళ్లే వాహనాలు అశోక జంక్షన్‌, ములుగు రోడ్డు, పెద్దమ్మగడ్డ, కేయూసీ, తిరుమల బార్‌, వడ్డేపల్లి చర్చి, ఫాతిమా సెంటర్‌, కాజీపేట మీదుగా వెళ్లాలి. కరీంనగర్‌ వెళ్లే వాహనాలు అశోక జంక్షన్‌, ములుగు రోడ్డు, పెద్దమ్మగడ్డ, కేయూసీ మీదుగా వెళ్లాలని సూచించారు. ఖమ్మం నుంచి హనుమకొండకు వచ్చే వాహనాలు సీఎస్ఆర్ గార్డెన్ జంక్షన్‌ వద్ద మళ్లింపు తీసుకుని పోతన జంక్షన్‌ మీదుగా చేరుకోవాలి. 100 ఫీట్ల రోడ్డుపై ఒకవైపు మాత్రమే వాహనాలను అనుమతిస్తారు. సీఎస్ఆర్ గార్డెన్ జంక్షన్‌ నుంచి అదాలత్‌ వైపు, అంబేడ్కర్ జంక్షన్‌ నుంచి కాలేజీ జంక్షన్‌ వరకు, ఫాతిమా జంక్షన్‌ నుంచి ఎన్ఐటీ వైపు ఉదయం 4 నుంచి 10 గంటల వరకు వాహనాలకు అనుమతి ఉండదని పోలీసులు స్పష్టం చేశారు. వాహనదారులు ప్రత్యామ్నాయ మార్గాల్లో ప్రయాణించి ట్రాఫిక్ పోలీసులకు సహకరించాలని కమిషనర్ కోరారు.
