తమ్మిడిహెట్టి పేరుతో మోసం!
నీళ్లపై అవగాహన లేకుండా ప్రాజెక్టులపై ప్రచారమా?
మేడిగడ్డ సాకుతో వార్ధా ప్రాజెక్టును నిలిపేశారు
మాజీ మంత్రి ఎర్రబెల్లి దయాకర్‌రావు విమర్శలు
కాకతీయ, తొర్రూరు : తెలంగాణను కరువు ప్రాంతంగా మారుస్తూ సిగ్గులేకుండా ఫొటోలకు పోజులిస్తున్నారని మాజీ మంత్రి, బీఆర్‌ఎస్‌ సీనియర్‌ నాయకుడు ఎర్రబెల్లి దయాకర్‌రావు కాంగ్రెస్ ప్రభుత్వంపై విమర్శలు చేశారు. తమ్మిడిహెట్టి ప్రాజెక్టుపై ఎలాంటి ఒప్పందాలు కుదరకముందే చర్చలు సఫలమయ్యాయని ప్రచారం చేసుకోవడం ఏమిటని ప్రశ్నించారు. చర్చలు నిజంగా సఫలమైతే ఎందుకు అధికారికంగా ప్రకటించలేదని నిలదీశారు. నీళ్లు, ప్రాజెక్టులపై కనీస అవగాహన లేకుండా ముఖ్యమంత్రి, మంత్రులు, ఎంపీలు మాట్లాడటం సిగ్గుచేటని తొర్రూరులో నిర్వహించిన విలేకరుల సమావేశంలో అన్నారు. తెలంగాణ ఏర్పడిన తర్వాత అప్పటి ముఖ్యమంత్రి కేసీఆర్ మూడు సార్లు మహారాష్ట్ర ముఖ్యమంత్రితో తమ్మిడిహెట్టిపై సానుకూల చర్చలు జరిపారని ఎర్రబెల్లి తెలిపారు. బరాజ్‌ ఎత్తును 148 మీటర్ల నుంచి 152 మీటర్లకు పెంచాలని కేసీఆర్ ప్రతిపాదించినప్పటికీ, మహారాష్ట్ర ప్రయోజనాల దృష్ట్యా అది కార్యరూపం దాల్చలేదన్నారు. కేంద్ర జల సంఘం నివేదికల ఆధారంగా తమ్మిడిహెట్టి వద్ద నీటి లభ్యత పరిమితంగా ఉన్నందునే కేసీఆర్ ముందుచూపుతో కాళేశ్వరం ప్రాజెక్టును నిర్మించారని పేర్కొన్నారు.
వార్ధా ప్రాజెక్టును ఎందుకు ఆపారు?
ఆదిలాబాద్‌ జిల్లాలో రెండు లక్షల ఎకరాల ఆయకట్టును స్థిరీకరించేందుకు డాక్టర్‌ బీఆర్‌ అంబేడ్కర్‌ వార్ధా ప్రాజెక్టుకు ప్రణాళికలు సిద్ధం చేశామని ఎర్రబెల్లి చెప్పారు. మేడిగడ్డను సాకుగా చూపి కాంగ్రెస్ ప్రభుత్వం వార్ధా ప్రాజెక్టును నిలిపివేసిందని ఆరోపించారు. మేడిగడ్డను బాగుచేసి సాగునీరు అందించలేని ప్రభుత్వం పక్క రాష్ట్రాలకు వెళ్లి ఫొటోలకు పోజులిస్తోందని విమర్శించారు. ముఖ్యమంత్రి పక్క రాష్ట్ర ముఖ్యమంత్రితో భేటీ కావడానికి మూడేళ్లు పట్టిందని అన్నారు. వైఎస్‌ రాజశేఖరరెడ్డి, రోశయ్య, కిరణ్‌కుమార్‌రెడ్డి హయాంలలోనూ తమ్మిడిహెట్టి ప్రాజెక్టుపై కమిటీలు వేయడం తప్ప తెలంగాణకు ప్రయోజనం చేకూరలేదని వ్యాఖ్యానించారు. తమ్మిడిహెట్టి పేరుతో కాలయాపన చేయకుండా, ప్రచారాలు ఆపి తెలంగాణకు సాగునీరు అందించడంపై దృష్టి సారించాలని ముఖ్యమంత్రి రేవంత్‌రెడ్డిని ఎర్రబెల్లి దయాకర్‌రావు డిమాండ్‌ చేశారు.
