అర్హులైన పట్టభద్లందరూ ఓటర్లుగా నమోదు చేసుకోవాలి!
నవంబర్‌ 6తో ఓటరు నమోదు గడువు ముగింపు
ప్రతి పట్టభద్రుడు ఈ అవకాశాన్ని సద్వినియోగం చేసుకోవాలి
కుటుంబ సభ్యులు, స్నేహితులనూ నమోదు చేయించాలి
ఏటా మళ్లీ నమోదు చేసుకునే విధానానికి స్వస్తి పలకాలి
ఓటరు జాబితాలో శాశ్వత నమోదు విధానం రావాలి
పట్టభద్రుల ఎమ్మెల్సీ ఓటరు నమోదుపై మధుసూదనాచారి పిలుపు
కాకతీయ, హ‌న్మ‌కొండ : పట్టభద్రుల ఎమ్మెల్సీ ఎన్నికల్లో ఓటు హక్కు వినియోగించుకునేందుకు అర్హత ఉన్న ప్రతి ఒక్కరూ నవంబర్‌ 6లోగా ఓటరుగా నమోదు చేసుకోవాలని శాసనమండలి ప్రతిపక్ష నాయకుడు మధుసూదనాచారి పిలుపునిచ్చారు. ఒక్క అర్హుడి పేరు కూడా ఓటరు జాబితాలో చేరకుండా మిగలకూడదని, కుటుంబ సభ్యులు, బంధువులు, స్నేహితులతో పాటు తమ ప్రాంతంలోని పట్టభద్రులందరినీ నమోదు చేయించే బాధ్యత తీసుకోవాలని కోరారు. వరంగల్‌లో బీఆర్‌ఎస్‌వీ కోఆర్డినేటర్‌ బైరపాక ప్రశాంత్‌ ఆధ్వర్యంలో ప్రభుత్వ పాలిటెక్నిక్‌ కళాశాల, ఏవీవీ డిగ్రీ, పీజీ కళాశాల, లాల్‌ బహదూర్‌ కళాశాలల్లో నిర్వహించిన అవగాహన సమావేశాల్లో ఆయన మాట్లాడారు. పట్టభద్రతకు సంబంధించిన ధ్రువీకరణ పత్రం, ఫొటో, గుర్తింపు పత్రాలతో ఓటరుగా నమోదు చేసుకోవచ్చని మధుసూదనాచారి తెలిపారు. ఎన్నికల సంఘం ఆమోదించిన గుర్తింపు పత్రాలను వినియోగించుకోవాలని, ఆన్‌లైన్‌లోనూ నమోదు ప్రక్రియ పూర్తి చేసుకోవచ్చన్నారు. చివరి తేదీ కోసం వేచి చూడకుండా అర్హులంతా వెంటనే దరఖాస్తు చేసుకోవాలని సూచించారు.
ఏటా నమోదు విధానంలో మార్పు రావాలి
ఒకసారి అర్హత సాధించి ఓటరుగా నమోదైన వారి పేర్లు నిరంతరం జాబితాలో కొనసాగే విధానం ఉండాలని మధుసూదనాచారి అభిప్రాయపడ్డారు. కొత్తగా అర్హత పొందిన పట్టభద్రుల పేర్లను చేర్చి, మరణించిన లేదా అర్హత కోల్పోయిన వారి పేర్లను తొలగించేలా విధానం రూపొందించాలన్నారు. ప్రతి ఎన్నికల సమయంలో మళ్లీ నమోదు చేసుకోవాల్సిన పరిస్థితిని మార్చాలని, ఈ అంశంపై భారత ఎన్నికల సంఘానికి సమగ్ర ప్రాతినిధ్యం సమర్పిస్తానని వెల్లడించారు. శాసనమండలి పునరుద్ధరణకు సంబంధించిన చరిత్రను ప్రస్తావిస్తూ, 2007లో బిల్లు ఆమోదం పొందిన అనంతరం 2008లో మండలి పునరుద్ధరించబడిందని తెలిపారు. ప్రజాస్వామ్యంలో వివిధ వర్గాలకు ప్రాతినిధ్యం కల్పించే శాసనమండలిలో పట్టభద్రుల గొంతుక వినిపించేందుకు ఈ నియోజకవర్గం కీలకమన్నారు. కార్యక్రమాల్లో మాజీ ఎంపీ బోయినపల్లి వినోద్‌కుమార్‌, మాజీ ఎమ్మెల్యే దాస్యం వినయ్‌ భాస్కర్‌, మాజీ కుడా చైర్మన్‌ యాదవరెడ్డి, రిటైర్డ్‌ ప్రొఫెసర్‌ దినేష్‌, మాజీ కార్పొరేటర్లు వద్దిరాజు గణేశ్‌, రమేష్‌, మసూద్‌, పార్టీ సీనియర్‌ నాయకులు పాల్గొన్నారు.
