మ‌హ ప్ర‌భో ఈ బియ్యం తీసుకెళ్లండి
మార్చి నెల నిల్వ‌ల‌తో రేషన్ డీల‌ర్ల‌కు అరిగోస
బూజుప‌ట్టిపోతున్న ప‌ట్టించుకోని అధికారులు
ఎలుకలు, పురుగులతో నాశ‌న‌మ‌వుతున్నాయ‌ని డీల‌ర్ల ఆవేదన
ఒక్క వరంగల్ జిల్లాలోనే 847 మెట్రిక్ టన్నుల నిల్వలు
కాకతీయ, ఖిలావరంగల్ : వరంగల్ జిల్లాలో గతంలో పంపిణీ చేసిన సుమారు 847 మెట్రిక్ టన్నుల దొడ్డు బియ్యాన్ని ప్రభుత్వం ఇప్పటికీ వెనక్కి తీసుకోకపోవడంతో రేషన్ షాపుల్లో నిల్వ సామర్థ్యం తగ్గిపోతోంది.
జిల్లా వ్యాప్తంగా ఉన్న 509 రేషన్ షాపుల్లో ఒక్కో షాపులో 5 నుంచి 40 క్వింటాళ్ల వరకు దొడ్డు బియ్యం పేరుకుపోయింది. కొత్తగా వచ్చే సన్న బియ్యం పంపిణీకి స్థలం లేక డీలర్లు ఇబ్బందులు పడుతున్నారు.
చాలా రోజులుగా నిల్వ ఉండటంతో దొడ్డు బియ్యం పాడైపోతుతున్నాయి. ఎలుకలు, పురుగులతో బియ్యం పూర్తిగా నాశ‌న‌మ‌వుతున్నాయి. షాపుల పరిశుభ్రత కూడా దెబ్బతింటోంది. దొడ్డు బియ్యం కారణంగా ఆకర్షితమైన ఎలుకలు, పురుగులు ఇప్పుడు సన్న బియ్యాన్ని కూడా పాడుచేస్తున్నాయని డీలర్లు ఆవేదన వ్యక్తం చేస్తున్నారు. మార్చి నెల నుంచే బియ్యం నిల్వల విషయంలో ఉన్నతాధికారులకు ఫిర్యాదులు, వినతిపత్రాలు ఇచ్చినప్పటికీ స్పందన లేకపోయిందని డీలర్లు ఆరోపిస్తున్నారు. వెంటనే ప్రభుత్వం జోక్యం చేసుకొని రేషన్ షాపుల్లో పేరుకున్న దొడ్డు బియ్యాన్ని వెనక్కి తీసుకోవాలని, లేకపోతే వేలం ద్వారా అమ్మడం లేదా ఇతర ప్రాంతాలకు తరలించడం వంటి చర్యలు తీసుకోవాలని వారు కోరుతున్నారు.
