లాటరీ పద్ధతిలో జనగామ మున్సిపల్ చైర్‌పర్సన్‌గా కడకంచి బాలమణి ఎన్నిక..
కాకతీయ, వరంగల్ బ్యూరో : జనగామ మున్సిపాలిటీలో చైర్‌పర్సన్ ఎన్నిక ఉత్కంఠభరితంగా సాగి చివరకు లాటరీ పద్ధతిలో ముగిసింది. కాంగ్రెస్ పార్టీ అభ్యర్థి కడకంచి బాలమణి లక్కీ డ్రా ద్వారా మున్సిపల్ చైర్‌పర్సన్‌గా ఎన్నికయ్యారు. సమాన ఓట్లు నమోదవడంతో అధికారులు నియమావళి ప్రకారం లాటరీ విధానాన్ని అనుసరించారు. ఎన్నికల ప్రక్రియ మున్సిపల్ కార్యాలయంలో రిటర్నింగ్ అధికారుల పర్యవేక్షణలో నిర్వహించబడింది. రెండు వర్గాల సభ్యులు సమాన సంఖ్యలో ఓట్లు పొందడంతో తుది నిర్ణయం లక్కీ డ్రా ద్వారా తీసుకున్నారు. లాటరీలో బాలమణి పేరు రావడంతో కాంగ్రెస్ శ్రేణులు ఆనందోత్సాహాలు వ్యక్తం చేశాయి.
వైస్ చైర్మన్‌గా భూష పర్వతాలు..
అదేవిధంగా జనగామ మున్సిపల్ వైస్ చైర్మన్‌గా 23వ వార్డు సభ్యుడు, బీఆర్ఎస్ పార్టీ మద్దతుదారు భూష పర్వతాలు ఎన్నికయ్యారు. ఈ పదవికి కూడా సమాన ఓట్లు రావడంతో లక్కీ డ్రా నిర్వహించగా భూష పర్వతాలు విజయం సాధించారు. ఈ ఎన్నికలతో జనగామ మున్సిపాలిటీలో అధికార–ప్రతిపక్షాల మధ్య సమతౌల్య పరిస్థితి నెలకొంది. చైర్‌పర్సన్ పదవి కాంగ్రెస్ దక్కగా, వైస్ చైర్మన్ పదవి బీఆర్ఎస్ మద్దతుదారునికి దక్కడం రాజకీయంగా ప్రాధాన్యత సంతరించుకుంది. ఎన్నికల అనంతరం భద్రతా ఏర్పాట్ల మధ్య ప్రమాణ స్వీకార కార్యక్రమం నిర్వహించేందుకు అధికారులు సన్నాహాలు చేస్తున్నారు. కొత్త పాలకవర్గం పట్టణ అభివృద్ధి, పారిశుధ్యం, తాగునీటి సరఫరా, రహదారుల అభివృద్ధి వంటి అంశాలపై దృష్టి సారిస్తామని నూతనంగా ఎన్నికైన ప్రజాప్రతినిధులు తెలిపారు.
