వన్యప్రాణుల వేటపై ఉక్కుపాదం

కాకతీయ, ములుగు: అటవీ సంపదను కొల్లగొట్టే, వన్యప్రాణుల మనుగడకు ముప్పు కలిగించే చర్యలను ఏమాత్రం ఉపేక్షించవద్దని రాష్ట్ర పర్యావరణ, అటవీ, శాస్త్ర సాంకేతిక శాఖ ప్రత్యేక ప్రధాన కార్యదర్శి జయేశ్ రంజన్ అధికారులకు స్పష్టం చేశారు. వన్యప్రాణుల వేట, అటవీ అగ్ని ప్రమాదాల నివారణకు జిల్లా యంత్రాంగం, పోలీసు, అటవీ శాఖలు సమన్వయంతో పటిష్ఠ నిఘా ఏర్పాటు చేసి సంయుక్త కార్యాచరణ అమలు చేయాలని ఆదేశించారు. శుక్రవారం ములుగు జిల్లా పర్యటనలో భాగంగా కలెక్టర్ బోర్ఖడే హేమంత్ సహదేవరావు, ఎస్పీ సుధీర్ రాంనాథ్ కేకన్, జిల్లా అటవీ అధికారి వికాస్ మీనాతో కలిసి తాడ్వాయి అటవీ ప్రాంతం, ఏటూరునాగారం అభయారణ్యం, జలగలంచ దుర్గం గుట్ట, కొండాయి ఫారెస్ట్ వాచ్ టవర్ ప్రాంతాలను సందర్శించారు. అటవీ సంపద, జీవవైవిధ్యం, వన్యప్రాణుల సంరక్షణకు తీసుకుంటున్న చర్యలను సమీక్షించారు. ఇటీవల అడవి దున్నను వేటాడిన ఘటనను ప్రస్తావిస్తూ ఇటువంటి అక్రమాలకు పాల్పడుతున్న వారిని గుర్తించడంతోపాటు వాటి వెనుక ఉన్న కారణాలను సమగ్రంగా పరిశీలించి బాధ్యులపై చట్టప్రకారం కఠిన చర్యలు తీసుకోవాలని సూచించారు. ప్రజల్లో వన్యప్రాణుల సంరక్షణపై అవగాహన కల్పించాలని, అగ్ని ప్రమాదాలు సంభవించిన తర్వాత స్పందించడం కంటే ముందుగానే నివారణ చర్యలు చేపట్టాలని స్పష్టం చేశారు. ఇందుకు అవసరమైన రాష్ట్ర ప్రభుత్వ సహకారం అందిస్తామని భరోసా ఇచ్చారు.

 గుత్తికోయల నివాస ప్రాంతాన్ని సందర్శించిన జయేశ్ రంజన్ వారి జీవన పరిస్థితులు, ఉపాధి అవకాశాలను స్వయంగా పరిశీలించారు. అడవులను నరికివేయకుండా జీవనోపాధి పొందేందుకు ఎలాంటి ప్రత్యామ్నాయ అవకాశాలు కల్పించవచ్చనే అంశంపై అధికారులతో చర్చించారు. అటవీ సంపదకు నష్టం కలిగించడం చట్టవిరుద్ధమని, ఇటువంటి చర్యలకు పాల్పడితే కఠిన చర్యలు తప్పవని వివరించారు. గుత్తికోయలకు ప్రత్యామ్నాయ ఉపాధి మార్గాలను గుర్తించి, అటవీ సంరక్షణకు విఘాతం కలగకుండా అవసరమైన చర్యలు చేపట్టాలని సూచించారు. ఏటూరునాగారం అభయారణ్యాన్ని మరింత సమర్థంగా సంరక్షిస్తూ అభివృద్ధి చేయడంపై దృష్టి సారించాలని తెలిపారు. ములుగు జిల్లాలోని దట్టమైన అడవులు, ప్రకృతి అందాలు, జీవవైవిధ్యం, చారిత్రక ప్రాంతాలు పర్యాటక అభివృద్ధికి ఎంతో అనుకూలమని పేర్కొన్నారు. పర్యావరణానికి నష్టం కలగకుండా ప్రకృతి సంపదను కాపాడుతూ పర్యాటక రంగాన్ని అభివృద్ధి చేసే అవకాశాలను పరిశీలిస్తామన్నారు. ఈ పర్యటనలో గుర్తించిన అంశాలపై రాష్ట్ర మంత్రి దనసరి అనసూయ సీతక్కతో చర్చించి ఆమె సూచనలను పరిగణనలోకి తీసుకుంటామని, హైదరాబాద్‌కు తిరిగి వెళ్లిన అనంతరం జిల్లా అభివృద్ధికి సమగ్ర ప్రణాళిక రూపొందించేందుకు కృషి చేస్తానని వెల్లడించారు.

వాతావరణ మార్పులు, ఎల్‌నినో ప్రభావాలను ఎదుర్కొనే విషయంలో పరిస్థితులు తీవ్రరూపం దాల్చే వరకు వేచి చూడకుండా ముందస్తు సన్నద్ధత చేపట్టాలని జయేశ్ రంజన్ పేర్కొన్నారు. వచ్చే నెల హైదరాబాద్‌లో నిర్వహించనున్న గ్లోబల్ సమ్మిట్‌లో ఎల్‌నినో ప్రభావాలపై ప్రత్యేక సదస్సు ఏర్పాటు చేస్తున్నట్లు వెల్లడించారు. వ్యవసాయం, తాగునీరు, సాగునీరు, అటవీ జీవజాలంతోపాటు అధిక ఉష్ణోగ్రతల్లో ఆరుబయట పనిచేసే కార్మికులు, గిగ్ వర్కర్లపై పడే ప్రభావాలను సమగ్రంగా చర్చించనున్నట్లు తెలిపారు. నిపుణుల సలహాలు, ఇతర ప్రాంతాల్లో అమలవుతున్న ఉత్తమ విధానాలను అధ్యయనం చేసి తక్షణ, ఏడాది, ఐదేళ్ల కాలానికి అనుసరించాల్సిన కార్యాచరణ రూపొందిస్తామన్నారు. అటవీ సంరక్షణ నుంచి వాతావరణ మార్పుల ఎదుర్కొలుపు వరకు అన్ని అంశాల్లో ముందస్తు ప్రణాళికతో ముందుకెళ్తామని స్పష్టం చేశారు. ఈ పర్యటనలో సంబంధిత అటవీ శాఖ అధికారులు, తదితర అధికారులు పాల్గొన్నారు.

📰 Share Epaper Clip