బీసీల హామీల అమలులో కాంగ్రెస్‌ విఫలం!
జీవో 14తో ఆత్మగౌరవ భవనాలకు ఆటంకాలు
సంక్షేమ పథకాలపై ప్రభుత్వ నిర్లక్ష్యం
జీవో రద్దయ్యే వరకు దశలవారీ ఉద్యమం
మాజీ ప్రభుత్వ చీఫ్‌ విప్‌, మాజీ ఎమ్మెల్యే దాస్యం వినయ్‌ భాస్కర్‌
కాకతీయ, హ‌న్మ‌కొండ : బీసీలకు ఇచ్చిన హామీలను అమలు చేయడంలో కాంగ్రెస్‌ ప్రభుత్వం పూర్తిగా విఫలమైందని మాజీ ప్రభుత్వ చీఫ్‌ విప్‌, మాజీ ఎమ్మెల్యే దాస్యం వినయ్‌ భాస్కర్‌ విమర్శించారు. జీవో నంబర్‌ 14లో మార్పులను నిరసిస్తూ శుక్రవారం కేయూ జంక్షన్‌ ఎస్డీఎస్సీ వద్ద మహాత్మా జ్యోతిబా ఫూలే విగ్రహం సమీపంలో బీసీ ప్రజాసంఘాల ప్రతినిధులతో కలిసి ఆయన పత్రికా సమావేశం నిర్వహించారు. బీసీల ఆత్మగౌరవ భవనాలు, సంక్షేమ పథకాలు, కులవృత్తుల అభివృద్ధిపై ప్రభుత్వం నిర్లక్ష్యంగా వ్యవహరిస్తోందని వినయ్‌ భాస్కర్‌ అన్నారు. ఏటా బీసీ సంక్షేమానికి రూ.20 కోట్లు కేటాయించాల్సి ఉండగా, బడ్జెట్‌లో ఎంత నిధులు ఇచ్చారో వెల్లడించాలని డిమాండ్‌ చేశారు. ఫీజు రీయింబర్స్‌మెంట్‌, 42 శాతం రిజర్వేషన్లు, కాంట్రాక్టుల్లో రిజర్వేషన్ల హామీల పరిస్థితి ఏమిటని ప్రశ్నించారు. గతంలో కేటాయించిన భూముల్లో బీసీ కుల సంఘాల ఆత్మగౌరవ భవనాల నిర్మాణానికి జీవో 14 అడ్డంకిగా మారుతోందని, దాని వెనుక ఉద్దేశాన్ని ప్రభుత్వం స్పష్టం చేయాలని కోరారు. గత ప్రభుత్వ హయాంలో గొల్ల, కురుమలకు గొర్రెల పంపిణీ, మత్స్యకారులకు చేపల పంపిణీ, బీసీలకు బీసీ బంధు ద్వారా ఆర్థిక చేయూత అందించామని గుర్తుచేశారు. ప్రస్తుత ప్రభుత్వం మూడేళ్లు కావస్తున్నా బీసీల ఆర్థికాభివృద్ధికి ప్రత్యేక కార్యక్రమాలు చేపట్టలేదని విమర్శించారు. నేత కార్మికుల సహకార సంఘాలకు ప్రభుత్వ ఆర్డర్లు ఇవ్వడం లేదని, చెరువుల నిర్వహణలో నిర్లక్ష్యంతో మత్స్యకార కుటుంబాల ఉపాధి దెబ్బతింటోందని అన్నారు.
జీవో 14 రద్దు చేయాల్సిందే
సర్దార్‌ సర్వాయి పాపన్నతో పాటు వివిధ బీసీ కులాల ప్రముఖుల జయంతి వేడుకలకు కనీస సౌకర్యాలు కల్పించాలని కోరారు. కార్యక్రమాలకు వచ్చే వారికి తాగునీరు, టీ, అల్పాహారం ఏర్పాటు చేయలేని పరిస్థితి ఉందని ఆవేదన వ్యక్తం చేశారు. ఆత్మగౌరవ భవనాల భూముల విషయంలో పారదర్శకత పాటించాలని డిమాండ్‌ చేశారు. జీవో 14ను రద్దు చేసే వరకు దశలవారీగా ఉద్యమాలు చేపడతామని హెచ్చరించారు. బీసీ, దళిత విద్యార్థులు, కుల సంఘాలు ఐక్యంగా పోరాటంలో భాగస్వాములు కావాలని పిలుపునిచ్చారు. ఫూలే ఆశయాల స్ఫూర్తితో బీసీల హక్కులు, ఆత్మగౌరవం కోసం ఉద్యమాన్ని విస్తరిస్తామని తెలిపారు.
