వ్యాపారి లింగారెడ్డిపై కేసు నమోదు
ఎనుమాముల మార్కెట్‌ కార్యదర్శిని బెదిరించిన ఫ‌లితం
నోటీసుల జారీపై బహిరంగంగా దుర్భాషలాడినట్లు ఫిర్యాదు
విధులకు ఆటంకం కలిగించి, ప్రాణభయం సృష్టించారని కార్యదర్శి ఆరోపణ
కాకతీయ, వరంగల్ ప్రతినిధి: వరంగల్ వ్యవసాయ మార్కెట్‌లో నోటీసుల జారీ వ్యవహారం పోలీస్‌ కేసుకు దారితీసింది. మార్కెట్‌ కార్యదర్శి విధులకు ఆటంకం కలిగిస్తూ, బహిరంగంగా దుర్భాషలాడి బెదిరించారన్న ఫిర్యాదుతో అడ్తి సెక్షన్‌ అధ్యక్షుడు ఎస్‌.ఎన్‌.రెడ్డి లింగారెడ్డిపై ఎనుమాముల పోలీసులు కేసు నమోదు చేశారు. మార్కెట్‌లో తూకాల వ్యత్యాసాలపై వ్యాపారులకు నోటీసులు జారీ చేసినందుకు తనను అవమానించారని కార్యదర్శి ఎన్‌.శ్రీనివాస్‌ ఫిర్యాదులో పేర్కొన్నారు. రైతులు మార్కెట్‌కు తీసుకొచ్చిన సరుకును కొనుగోలు చేసే సమయంలో కొందరు అడ్తిదారులు తక్కువ తూకం నమోదు చేస్తూ చెల్లింపుల్లో మోసాలకు పాల్పడుతున్నట్లు గుర్తించామని కార్యదర్శి తెలిపారు. ఈ వ్యవహారంపై కార్యాలయ విధుల్లో భాగంగా ఈ నెల 10న సంబంధిత అడ్తిదారులకు నోటీసులు జారీ చేసినట్లు ఫిర్యాదులో వివరించారు. ఆ నోటీసుల కారణంగా గురువారం ఉదయం పత్తి యార్డులో జెండాపాట జరుగుతున్న సమయంలో లింగారెడ్డి తనను అడ్డుకున్నారని ఆరోపించారు. వేలాది మంది రైతులు, వ్యాపారులు, గుమాస్తాలు, మార్కెట్‌ చైర్‌పర్సన్‌, సిబ్బంది సమక్షంలోనే దుర్భాషలాడుతూ అవమానించారని పేర్కొన్నారు.
‘ఇది మా మార్కెట్‌.. మేము చెప్పినట్టే నడవాలి’
‘నువ్వు ఎక్కడి నుంచి వచ్చావు? ఏ మార్కెట్‌ నుంచి వచ్చావు? ఇది మా మార్కెట్‌.. మేము చెప్పినట్టే నడవాలి. నువ్వు నోటీసులు ఎలా ఇస్తావు?’ అంటూ బెదిరించారని కార్యదర్శి ఫిర్యాదులో పేర్కొన్నారు. అంతేకాకుండా తనను అక్కడి నుంచి కదలనివ్వకుండా అడ్డుకుని, ప్రాణభయం కలిగించారని ఆరోపించారు. ఉన్నతాధికారులతో చర్చించిన అనంతరం శుక్రవారం ఎనుమాముల పోలీస్‌స్టేషన్‌లో ఫిర్యాదు చేశారు. కార్యదర్శి ఫిర్యాదును స్వీకరించిన పోలీసులు క్రైమ్‌ నంబర్‌ 242/2026గా కేసు నమోదు చేశారు. భారతీయ న్యాయ సంహితలోని 126(2), 221, 224, 352, 351 సెక్షన్ల కింద కేసు నమోదు చేసినట్లు ఏనుమాముల సీఐ జవ్వాజి సురేష్ తెలిపారు. మార్కెట్‌ లావాదేవీల్లో అవకతవకలపై అధికారులు తీసుకుంటున్న చర్యల నేపథ్యంలో ఈ ఘటన చోటుచేసుకోవడం చర్చనీయాంశంగా మారింది.
