రొయ్యూరులో అభివృద్ధి పనులకు శ్రీకారం
రూ.కోటి నిధులతో అంతర్గత సీసీ రోడ్ల నిర్మాణం
గ్రామీణ మౌలిక వసతుల కల్పనకు మంత్రి సీతక్క చొరవ
కాకతీయ, ఏటూరునాగారం రూరల్‌: గ్రామాల అభివృద్ధే లక్ష్యంగా మంత్రి సీతక్క ప్రత్యేక చొరవ తీసుకుంటున్నారని కాంగ్రెస్‌ నాయకులు అన్నారు. ఏటూరునాగారం మండలం రొయ్యూరు గ్రామంలో అంతర్గత సీసీ రోడ్ల నిర్మాణానికి పంచాయతీరాజ్‌, గ్రామీణాభివృద్ధి శాఖ నిధుల నుంచి మంత్రి డాక్టర్‌ ధనసరి అనసూయ సీతక్క రూ.కోటి మంజూరు చేశారు. ఈ నిధులతో చేపట్టనున్న పనులకు శుక్రవారం సర్పంచ్‌ కావేరి అర్జున్‌ ఆధ్వర్యంలో శంకుస్థాపన చేశారు. ములుగు జిల్లా కాంగ్రెస్‌ అధ్యక్షుడు పైడాకుల అశోక్‌ సూచనల మేరకు మండల కాంగ్రెస్‌ అధ్యక్షుడు దేవులపల్లి విజయకుమార్‌ ఆధ్వర్యంలో కార్యక్రమం నిర్వహించారు. అంతర్గత రహదారులు సీసీ రోడ్లుగా అభివృద్ధి చెందితే ప్రజల రాకపోకలకు ఇబ్బందులు తొలగడంతో పాటు పారిశుద్ధ్యం, మౌలిక వసతులు మెరుగుపడతాయని నాయకులు పేర్కొన్నారు. గ్రామీణ ప్రజల అవసరాలను గుర్తించి నిధులు మంజూరు చేసిన మంత్రి సీతక్కకు గ్రామస్తులు, కాంగ్రెస్‌ నాయకులు కృతజ్ఞతలు తెలిపారు. కార్యక్రమంలో జిల్లా ఆత్మ కమిటీ చైర్మన్‌ చిటమట రఘు, జిల్లా కార్యదర్శి గుడ్ల దేవేందర్‌, కొండగొర్ల పోచయ్య, మండల వర్కింగ్‌ ప్రెసిడెంట్‌ డోంగిరి మధుబాబు, ఆత్మ డైరెక్టర్‌ సోదరి రామయ్య, నాయకులు జిమిడా రవి, అల్లంల రమేష్‌, మూలకాల శ్రీను, ఉపసర్పంచ్‌ ఆకుదారి మహేష్‌, వార్డు సభ్యులు, గ్రామ నాయకులు, కార్యకర్తలు, ప్రజాప్రతినిధులు, గ్రామస్తులు పాల్గొన్నారు.
