కాళోజీ కళాక్షేత్రానికి కుడా కార్యాలయం
మొదటి అంతస్తులో కొత్త కార్యాలయం ఏర్పాటు
ఈ నెల 16 నుంచి అందుబాటులోకి సేవలు
కాకతీయ, హనుమకొండ: కాకతీయ అర్బన్‌ డెవలప్‌మెంట్‌ అథారిటీ (కుడా) వరంగల్ కార్యాలయాన్ని హనుమకొండలోని కాళోజీ కళాక్షేత్రం మొదటి అంతస్తుకు తరలిస్తున్నారు. ప్రస్తుతం హనుమకొండలో కొనసాగుతున్న కార్యాలయాన్ని కొత్త ప్రాంగణంలోకి మార్చే పనులు చేపట్టారు. ఈ నెల 16వ తేదీ సోమవారం నుంచి కాళోజీ కళాక్షేత్రం నుంచే కుడా కార్యాలయ సేవలు అందుబాటులోకి రానున్నాయి. కుడా కార్యాలయం తరలింపుతో ప్రస్తుతం వినియోగిస్తున్న భవనం ఖాళీ కానుంది. ఆ భవనంలో ఐటీ శాఖ కార్యాలయాన్ని ఏర్పాటు చేసేందుకు అధికారులు ఏర్పాట్లు చేస్తున్నట్లు సమాచారం. దీంతో ప్రభుత్వ కార్యాలయాల కార్యకలాపాలు ఒకే ప్రాంతంలో కొనసాగనున్నాయి. వరంగల్ నగరం, పరిసర ప్రాంతాల పట్టణాభివృద్ధి, మౌలిక సదుపాయాలు, అభివృద్ధి ప్రణాళికల్లో కీలకంగా వ్యవహరించే కుడా కార్యాలయం కొత్త ప్రాంగణానికి మారడంతో వివిధ పనుల కోసం వచ్చే ప్రజలు సోమవారం నుంచి కాళోజీ కళాక్షేత్రం మొదటి అంతస్తులోని కార్యాలయాన్ని సంప్రదించాల్సి ఉంటుంది.
