వెట్లపాలెం బాణాసంచా కర్మాగ‌రంలో పేలుళ్లు!
సజీవదహనమైన 18 మంది కార్మికులు
తీవ్రంగా గాయపడిన మరో 15 మంది
మంటల్లో కాలిపోయిన తయారీ షెడ్‌లు
రక్షణ చర్యల్లో నిమగ్నమైన అగ్నిమాపక సిబ్బంది
పేలుడు కారణాలపై దర్యాప్తు ప్రారంభం
దిగ్బ్రాంతి వ్యక్తం చేసిన ఏపీ సీఎం చంద్రబాబు నాయుడు
కాకతీయ, ఏపీ బ్యూరో : ఆంధ్రప్రదేశ్‌లోని కాకినాడ జిల్లాలో శనివారం ఘోర ప్రమాదం చోటుచేసుకుంది. వెట్లపాలెం వద్ద ఉన్న బాణాసంచా తయారీ కేంద్రంలో సంభవించిన భారీ పేలుళ్లు రాష్ట్రవ్యాప్తంగా కలకలం రేపాయి. ఒక్కసారిగా సంభవించిన శక్తివంతమైన పేలుళ్లతో 18 మంది కార్మికులు సజీవదహనమయ్యారు. మరో 15 మంది తీవ్రంగా గాయపడ్డారు. గాయపడిన వారిలో పలువురి పరిస్థితి విషమంగా ఉన్నట్లు వైద్యులు తెలిపారు. మృతుల్లో అధిక సంఖ్యలో మహిళలు ఉన్నారని సమాచారం, దీంతో గ్రామంలో విషాద వాతావరణం నెలకొంది. సాక్షుల వివరాల ప్రకారం, మధ్యాహ్న సమయంలో సాధారణంగా తయారీ ప్రక్రియ కొనసాగుతుండగా అకస్మాత్తుగా భారీ శబ్దంతో పేలుడు సంభవించింది. వెంటనే మంటలు చెలరేగి పక్కనే ఉన్న తయారీ షెడ్‌లకు వేగంగా వ్యాపించాయి. పేలుళ్ల తీవ్రత అంతగా ఉండటంతో సమీప ప్రాంతాలు కంపించాయి. దట్టమైన పొగలు ఎగసిపడటంతో ప్రజలు భయాందోళనకు గురై పరుగులు తీశారు.
సీఎం చంద్రబాబు దిగ్భ్రాంతి
ఈ ఘటనపై సమాచారం అందుకున్న ముఖ్యమంత్రి నారా చంద్రబాబు నాయుడు తీవ్ర దిగ్భ్రాంతి వ్యక్తం చేశారు. ప్రస్తుతం విజయనగరం జిల్లా పర్యటనలో ఉన్న ఆయన, బాధితుల కుటుంబాలకు ప్రగాఢ సానుభూతి తెలిపారు. పరిస్థితి తీవ్రతను దృష్టిలో ఉంచుకుని హోంమంత్రి వంగలపూడి అనితను వెంటనే సంఘటనా స్థలానికి వెళ్లాలని ఆదేశించారు. సహాయక చర్యలను సమీక్షించి బాధితులకు తక్షణ వైద్య సహాయం అందేలా చర్యలు తీసుకోవాలని సూచించారు. జిల్లా కలెక్టర్, పోలీసు ఉన్నతాధికారులను అప్రమత్తం చేస్తూ క్షతగాత్రులను సమీప ఆసుపత్రులకు తరలించి మెరుగైన చికిత్స అందించాలని ఆదేశించారు. ప్రమాదానికి గల కారణాలపై ప్రాథమిక విచారణ జరిపి నివేదిక సమర్పించాలని కూడా సూచించారు.
మంటల్లో చిక్కుకున్న కార్మికులు
పేలుడు సంభవించిన సమయంలో కేంద్రంలో పనిచేస్తున్న కార్మికులు బయటకు పరుగులు తీయడానికి ప్రయత్నించినా, మంటలు వేగంగా వ్యాపించడంతో పలువురు చిక్కుకుపోయినట్లు తెలుస్తోంది. మృతుల్లో ఎక్కువమంది స్థానికులు, సమీప గ్రామాలకు చెందిన కార్మికులేనని సమాచారం. తీవ్ర గాయాలపాలైన వారిని సమీప ఆసుపత్రులకు తరలించి చికిత్స అందిస్తున్నారు. సమాచారం అందుకున్న వెంటనే అగ్నిమాపక దళాలు, పోలీసులు ఘటనాస్థలికి చేరుకుని మంటలను అదుపులోకి తెచ్చేందుకు తీవ్రంగా శ్రమించారు. పేలుళ్ల తీవ్రత కారణంగా మంటలను పూర్తిగా ఆర్పేందుకు కొంత సమయం పట్టింది. శిథిలాల కింద మరెవరైనా చిక్కుకుపోయి ఉండవచ్చనే అనుమానంతో శోధన కొనసాగుతోంది.
కారణాలపై అనుమానాలు
ప్రాథమిక సమాచారం ప్రకారం భద్రతా నిబంధనల లోపం లేదా పేలుడు పదార్థాల నిర్లక్ష్య నిర్వహణ కారణంగా ప్రమాదం సంభవించి ఉండవచ్చని అధికారులు అనుమానిస్తున్నారు. తయారీ కేంద్రానికి అవసరమైన అనుమతులు సక్రమంగా ఉన్నాయా? భద్రతా ప్రమాణాలు పాటించారా? అనే అంశాలపై దర్యాప్తు ప్రారంభమైంది. ఈ దుర్ఘటనతో వెట్లపాలెం గ్రామం విషాదంలో మునిగిపోయింది. మృతుల కుటుంబాలకు ప్రభుత్వం ఆర్థిక సాయం ప్రకటించే అవకాశముందని సమాచారం. ప్రమాదానికి గల పూర్తి కారణాలు వెలుగులోకి రావాల్సి ఉంది.
