బీజేపీ జిల్లా కార్యదర్శిగా పోనగోటి వెంకట్ రావు

బీజేపీ జిల్లా కార్యదర్శిగా పోనగోటి వెంకట్ రావు
మడికొండకు చెందిన నేతకు దక్కిన గుర్తింపు
అధికారికంగా ప్రకటించిన జిల్లా అధ్యక్షుడు గంట రవికుమార్
13 ఏళ్ల కష్టానికి దక్కిన ప్రతిఫలమని హర్షం
పార్టీ బలోపేతానికి కృషి చేస్తానని వెంకట్ రావు వెల్లడి

కాకతీయ, హనుమకొండ: వరంగల్ జిల్లా భారతీయ జనతా పార్టీ కార్యదర్శిగా మడికొండ గ్రామానికి చెందిన సీనియర్ నాయకుడు పోనగోటి వెంకట్ రావు నియమితులయ్యారు. ఈ నియామకాన్ని జిల్లా అధ్యక్షుడు గంట రవికుమార్ అధికారికంగా ప్రకటించి, నియామక పత్రాన్ని అందజేశారు. గత కొంతకాలంగా పార్టీలో చురుకైన పాత్ర పోషిస్తున్న వెంకట్ రావుకు జిల్లా స్థాయిలో కీలక బాధ్యతలు అప్పగించడంపై పార్టీ శ్రేణులు హర్షం వ్యక్తం చేస్తున్నాయి.

నాయకత్వానికి కృతజ్ఞతలు

తన నియామకంపై పోనగోటి వెంకట్ రావు స్పందిస్తూ.. తనకు ఈ బాధ్యతను అప్పగించిన బీజేపీ రాష్ట్ర అధ్యక్షుడు ఎన్. రాంచందర్ రావు, జిల్లా అధ్యక్షుడు గంట రవికుమార్, మాజీ ఎమ్మెల్యేలు, ఇతర రాష్ట్ర, జిల్లా నాయకత్వానికి ప్రత్యేక కృతజ్ఞతలు తెలిపారు. ముఖ్యంగా మడికొండ గ్రామ కార్యకర్తలు, నాయకుల నిరంతర సహకారం వల్లే తాను ఈ స్థాయికి చేరుకున్నానని ఆయన ఈ సందర్భంగా గుర్తు చేసుకున్నారు.

పార్టీ బలోపేతమే లక్ష్యం

గత 13 సంవత్సరాలుగా మడికొండ పరిధిలో పార్టీ బలోపేతానికి తాను చేసిన కృషిని గుర్తించి పార్టీ ఈ పదవిని ఇచ్చిందని వెంకట్ రావు పేర్కొన్నారు. పార్టీ తనపై ఉంచిన నమ్మకాన్ని వమ్ము చేయకుండా, రానున్న రోజుల్లో వరంగల్ జిల్లా వ్యాప్తంగా బీజేపీని మరింత శక్తివంతంగా మార్చడానికి, ప్రజా సమస్యల పరిష్కారానికి అహర్నిశలు శ్రమిస్తానని ఆయన స్పష్టం చేశారు. ఈ కార్యక్రమంలో పలువురు బీజేపీ నాయకులు, మడికొండ కార్యకర్తలు పాల్గొని వెంకట్ రావును ఘనంగా సన్మానించారు.