విద్యా ప్రమాణాల మెరుగుదలపై ప్రత్యేక దృష్టి
ఎఫ్‌ఏ–2 ఫలితాలను విశ్లేషించి కార్యాచరణ రూపొందించాలి
విద్యతోపాటు క్రీడలు, ఇతర కార్యక్రమాలకు ప్రాధాన్యం
ఐటీడీఏ పీఓ లెనిన్‌ వత్సల్‌ టోప్పో ఆదేశం
కాకతీయ, ఏటూరునాగారం రూరల్‌: విద్యార్థుల విద్యా ప్రమాణాలను మెరుగుపరచడంతోపాటు వారి సమగ్ర అభివృద్ధిపై ప్రత్యేక దృష్టి సారించాలని ఐటీడీఏ పీఓ లెనిన్‌ వత్సల్‌ టోప్పో అధికారులను ఆదేశించారు. ఏటూరునాగారంలోని ఐటీడీఏ సమావేశ మందిరంలో డీడీలు, ఆర్‌సీఓలు, డీటీడీఓలు, ఏటీడీఓలు, డిప్యూటీ ఈవోలు, ఏసీఎంఓలు, జీసీడీఓలతో ఆయన సమీక్ష నిర్వహించారు. గిరిజన సంక్షేమ విద్యాసంస్థల్లో టీచింగ్‌, నాన్‌టీచింగ్‌ సిబ్బంది ఖాళీల వివరాలను సమీక్షించారు. విద్యార్థుల విద్యాభివృద్ధికి అవసరమైన చర్యలు చేపట్టాలని, ప్రభుత్వం నిర్దేశించిన డైట్‌ మెనూను తప్పనిసరిగా అమలు చేసి నాణ్యమైన ఆహారం అందేలా పర్యవేక్షించాలని సూచించారు. విద్యతోపాటు క్రీడలు, ఎక్స్‌ట్రా కరిక్యులర్‌, క్లబ్‌ కార్యకలాపాలకు ప్రాధాన్యత ఇవ్వాలన్నారు. ఇటీవల నిర్వహించిన ఎఫ్‌ఏ–2 పరీక్షల ఫలితాలను సమగ్రంగా విశ్లేషించి విద్యా ప్రమాణాల మెరుగుదలకు ప్రత్యేక కార్యాచరణ రూపొందించాలని ఆదేశించారు. దసరా సెలవుల అనంతరం అకడమిక్‌, ఎక్స్‌ట్రా కరిక్యులర్‌ కార్యక్రమాల నిర్వహణకు స్పష్టమైన కార్యాచరణ సిద్ధం చేయాలని సూచించారు. అర్హులైన విద్యార్థులకు ప్రీ–మెట్రిక్‌ స్కాలర్‌షిప్‌లు సకాలంలో అందేలా చర్యలు తీసుకోవాలని, యూనిఫాం స్టిచింగ్‌ పనులను నిర్ణీత గడువులోగా పూర్తి చేయాలని ఆదేశించారు. అన్ని విభాగాల అధికారులు సమన్వయంతో పనిచేయాలని పీఓ లెనిన్‌ వత్సల్‌ టోప్పో సూచించారు.
