రైతుల ధాన్యం కష్టాలు పట్టించుకోరా?
విత్తనాల కోసం సెల్ఫ్‌ డిక్లరేషన్‌పై సంతకాల ఒత్తిడి
రైతుల సమస్యలను అధికారుల దృష్టికి తీసుకెళ్తా
అమ్మాపురంలో ప్రైవేటు వ్యక్తులకు ధాన్యం విక్రయిస్తున్న రైతులు
: మాజీ మంత్రి ఎర్రబెల్లి దయాకర్‌రావు
కాకతీయ, తొర్రూరు : రైతుల సమస్యలను అధికారుల దృష్టికి తీసుకెళ్లి పరిష్కారానికి కృషి చేస్తానని మాజీ మంత్రి ఎర్రబెల్లి దయాకర్‌రావు హామీ ఇచ్చారు. అమ్మాపురంలో పలు కార్యక్రమాల్లో పాల్గొని తొర్రూరుకు వెళ్తున్న ఆయన వాహనాన్ని రైతులు ఆపి తమ సమస్యలను వివరించారు. విత్తనాలు కొనుగోలు చేసేందుకు వెళ్లిన రైతులతో బలవంతంగా స్వీయ ప్రకటన పత్రాలపై సంతకాలు చేయిస్తున్నారని ఆవేదన వ్యక్తం చేశారు. ధాన్యాన్ని ప్రైవేటు వ్యక్తులకు విక్రయించాల్సిన పరిస్థితి ఏర్పడిందని తెలిపారు. ఈ సందర్భంగా ఎర్రబెల్లి దయాకర్‌రావు మాట్లాడుతూ రైతులకు భరోసా ఇవ్వాల్సిన ప్రభుత్వం వారిని ఇబ్బందులకు గురిచేస్తోందని విమర్శించారు. కరోనా సమయంలో అమ్మాపురం గ్రామానికి కలెక్టర్‌ను పంపించి ప్రజలకు ఇబ్బందులు లేకుండా చూసిన ఘనత అప్పటి ముఖ్యమంత్రి కేసీఆర్‌కే దక్కుతుందని అన్నారు. ప్రస్తుత ప్రభుత్వం రైతుల నుంచి స్వీయ ప్రకటనలు తీసుకుంటూ ఇబ్బందులకు గురిచేస్తోందని ఆరోపించారు. కరెంటు కోతలు, సాగునీటి కొరతతో ఇప్పటికే పలువురు రైతులు నష్టపోయారని, పంటలు దెబ్బతిన్న రైతులకు నష్టపరిహారం అందించాలని డిమాండ్‌ చేశారు. ధాన్యం ధరల పెరుగుదలపై గొప్పలు చెప్పుకోవడం కాదని, రైతులకు వాస్తవంగా అందుతున్న ప్రయోజనాలపై ప్రభుత్వం సమాధానం చెప్పాలని విమర్శించారు.
