బొడ్డుచింతలపల్లిని ఆదర్శ గ్రామంగా తీర్చిదిద్దాలి
అభివృద్ధి పనులను పరిశీలించిన డీపీఓ కె.కల్పన
సమిష్టి కృషితోనే జాతీయ స్థాయిలో గుర్తింపు : సర్పంచ్ వనిత
కాకతీయ, గీసుగొండ : బొడ్డుచింతలపల్లి గ్రామాన్ని అభివృద్ధి, పారిశుధ్యం, పర్యావరణ పరిరక్షణలో ఆదర్శంగా తీర్చిదిద్దాలని జిల్లా పంచాయతీ అధికారి కె.కల్పన సూచించారు. మండలంలోని బొడ్డు చింతలపెళ్లి గ్రామాన్ని సందర్శించిన ఆమె పంచాయతీ రికార్డులు, పల్లె ప్రకృతి వనం, పారిశుధ్య నిర్వహణతో పాటు వివిధ అభివృద్ధి పనులను క్షేత్రస్థాయిలో పరిశీలించి అధికారులకు పలు సూచనలు చేశారు. గ్రామంలో వంద శాతం ఇంటి పన్నుల వసూళ్లు చేపట్టాలని, తడి, పొడి చెత్తను వేరు చేసి సేంద్రియ ఎరువుల తయారీని ప్రోత్సహించాలని ఆదేశించారు. ప్లాస్టిక్ వినియోగాన్ని అరికట్టడంతో పాటు నీటి సంరక్షణకు ప్రాధాన్యత ఇవ్వాలని, జల వనరులను కాపాడుకోవాలని సూచించారు. వీధిదీపాలకు స్విచ్‌లు ఏర్పాటు చేసి విద్యుత్‌ను పొదుపుగా వినియోగించాలన్నారు. ఈ సందర్భంగా సర్పంచ్ పోగుల వనిత యుగేందర్ గ్రామంలో చేపడుతున్న కార్యక్రమాలను డీపీఓకు వివరించారు. కేంద్ర ప్రభుత్వం, సర్పంచ్ సంవాద్, క్వాలిటీ కౌన్సిల్ ఆఫ్ ఇండియా సంయుక్తంగా నిర్వహించిన స్వచ్ఛ, హరిత పంచాయతీ పోటీల్లో బొడ్డుచింతలపల్లి జాతీయ స్థాయిలో ద్వితీయ బహుమతి సాధించిందని తెలిపారు. ప్రజాప్రతినిధులు, అధికారులు, గ్రామస్థుల సమిష్టి కృషితోనే ఈ గుర్తింపు లభించిందన్నారు. నర్సరీలో పెంచిన పూలు, పండ్లు, ఔషధ మొక్కలను ఉచితంగా పంపిణీ చేస్తున్నామని, చెత్త వేరు చేసే కేంద్రంలో తయారుచేసిన వర్మీ కంపోస్ట్‌ను రైతులకు తక్కువ ధరకు అందిస్తున్నామని పేర్కొన్నారు. వస్త్ర, జనపనార సంచుల పంపిణీతో ప్లాస్టిక్ వినియోగాన్ని తగ్గిస్తున్నామని, ప్రతి శుక్రవారం ప్రత్యేక పారిశుధ్య కార్యక్రమాలు నిర్వహిస్తూ దోమల నివారణకు ఫాగింగ్ చేపడుతున్నామని వివరించారు. అనంతరం ఏలుకుర్తి గ్రామ పంచాయతీని సందర్శించిన డీపీఓ అక్కడి రికార్డులను పరిశీలించారు. గ్రామంలో నీటి సంరక్షణ పనులు చేపట్టాలని, మహిళా సంఘాల భవన నిర్మాణాన్ని త్వరితగతిన పూర్తి చేయాలని సర్పంచ్‌కు సూచించారు. ఈ కార్యక్రమంలో ఇన్‌చార్జి ఎంపీడీఓ శ్రీధర్ గౌడ్, సర్పంచ్‌లు దివ్యభారతి, పోగుల వనిత, పంచాయతీ కార్యదర్శి దేవేందర్, ఉపసర్పంచ్ నేరెళ్ల శైలజ, వార్డు సభ్యులు, క్షేత్ర సహాయకురాలు లత, గ్రామస్థులు పాల్గొన్నారు.
