మేడిగడ్డ పాపం కేసీఆర్‌దే
కుంగుబాటుకు గత ప్రభుత్వ నిర్ణయాలే కారణం
ప్రాణహితను పక్కనపెట్టి కాళేశ్వరానికి ప్రాధాన్యమిచ్చారు
పదేళ్ల పాలనలో పాలమూరు ప్రాజెక్టులను పూర్తి చేయని కేసీఆర్‌!
సాగునీటి ప్రాజెక్టులపై అసెంబ్లీలో చర్చకు సిద్ధం
డిసెంబరులో రెండు రోజుల ప్రత్యేక చర్చకు ప్రతిపాదన
ఎల్‌నినో కరువు ముప్పును ఎదుర్కొనేందుకు రైతులు సిద్ధం కావాలి
కొడంగల్ అభివృద్ధికి రూ.10 వేల కోట్లతో ప్రణాళికలు
కొడంగల్ సభలో ముఖ్యమంత్రి రేవంత్ రెడ్డి
కాకతీయ,తెలంగాణ బ్యూరో : పదేళ్లు రాష్ట్రాన్ని పాలించిన కేసీఆర్‌ పాలమూరు జిల్లాలో సాగునీటి ప్రాజెక్టులను పూర్తి చేయలేకపోయారని ముఖ్యమంత్రి రేవంత్‌రెడ్డి విమర్శించారు. ప్రాణహిత ప్రాజెక్టును పక్కనపెట్టి కాళేశ్వరం ప్రాజెక్టుకు ప్రాధాన్యమిచ్చారని, చివరకు మేడిగడ్డ బ్యారేజీ కుంగిపోయే పరిస్థితి వచ్చిందని వ్యాఖ్యానించారు. గత ప్రభుత్వ హయాంలో చేపట్టిన ప్రాజెక్టుల నిర్మాణం, వాటి ప్రస్తుత పరిస్థితి, ప్రజాధనం వినియోగంపై సమగ్ర చర్చ జరగాల్సిన అవసరం ఉందన్నారు. కాళేశ్వరం, గోదావరి జలాల వినియోగం, ఇతర సాగునీటి ప్రాజెక్టులపై డిసెంబరులో అసెంబ్లీలో రెండు రోజుల పాటు ప్రత్యేక చర్చకు అవకాశం కల్పించాలని స్పీకర్‌ను కోరనున్నట్లు వెల్లడించారు. శ‌నివారం మ‌హ‌బూబ్‌న‌గ‌ర్ జిల్లా కొడంగల్‌లో ఆదర్శ రైతులు, వ్యవసాయ శాస్త్రవేత్తలతో నిర్వహించిన ముఖాముఖి కార్యక్రమంలో సీఎం ఈ వ్యాఖ్యలు చేశారు. హైదరాబాద్‌ రాష్ట్ర తొలి ముఖ్యమంత్రి బూర్గుల రామకృష్ణారావు పాలమూరు ప్రాంత అభివృద్ధికి ఇచ్చిన ప్రాధాన్యాన్ని రేవంత్‌రెడ్డి గుర్తుచేశారు. ఆ ప్రాంతానికి సాగునీరు అందించాలనే లక్ష్యంతో చేపట్టిన కల్వకుర్తి, భీమా, నెట్టెంపాడు, కోయిల్‌సాగర్‌ ప్రాజెక్టుల ప్రాధాన్యాన్ని వివరించారు. మక్తల్‌–కొడంగల్–నారాయణపేట ఎత్తిపోతల పథకం ద్వారా ఈ ప్రాంతానికి సాగునీరు అందించాలనే లక్ష్యాన్ని కూడా ప్రస్తావించారు. అయితే గత పదేళ్ల పాలనలో ఈ ప్రాజెక్టులు పూర్తిస్థాయిలో అందుబాటులోకి రాలేదని విమర్శించారు. పాలమూరు ప్రాంత రైతులకు సాగునీటి భరోసా కల్పించడంలో గత ప్రభుత్వం విఫలమైందని వ్యాఖ్యానించారు. ప్రాణహిత–చేవెళ్ల ప్రాజెక్టును పక్కనపెట్టి కాళేశ్వరం ప్రాజెక్టును చేపట్టిన తీరును సీఎం ప్రస్తావించారు. కాళేశ్వరం నిర్మాణం, మేడిగడ్డ బ్యారేజీ కుంగుబాటు, కన్నెపల్లి పంపుల పరిస్థితి వంటి అంశాలపై సభలో చర్చ జరగాలని అన్నారు. ఎల్లంపల్లి, దేవాదుల, సీతారామ ప్రాజెక్టు, సమ్మక్క సారలమ్మ, తుపాకులగూడెం ప్రాజెక్టుల నిర్మాణం, వాటి వినియోగం వంటి అంశాలనూ చర్చలోకి తీసుకురావాలని సూచించారు. కాళేశ్వరం ప్రాజెక్టుపై సీబీఐ విచారణ కొనసాగుతోందని పేర్కొన్నారు.
డిసెంబరులో అసెంబ్లీలో రెండు రోజుల చర్చ
రాష్ట్ర సాగునీటి రంగానికి సంబంధించిన అంశాలను రాజకీయ విమర్శలకే పరిమితం చేయకుండా శాసనసభ వేదికగా సమగ్రంగా చర్చించాలని రేవంత్‌రెడ్డి అన్నారు. కాళేశ్వరం ప్రాజెక్టు నిర్మాణం, మేడిగడ్డ బ్యారేజీ కుంగుబాటు, గోదావరి జలాల వినియోగం, గత ప్రభుత్వ హయాంలో చేపట్టిన ఇతర ప్రాజెక్టుల పరిస్థితిపై సభ్యులందరికీ మాట్లాడే అవకాశం ఉండాలని అభిప్రాయపడ్డారు. ఈ అంశాలపై డిసెంబరులో రెండు రోజుల పాటు ప్రత్యేక చర్చ నిర్వహించేందుకు స్పీకర్‌ను కోరనున్నట్లు తెలిపారు. సాగునీటి ప్రాజెక్టులపై గతంలో తీసుకున్న నిర్ణయాలు, వాటి ఫలితాలు, భవిష్యత్‌లో చేపట్టాల్సిన చర్యలపై సభలో చర్చించేందుకు ప్రభుత్వం సిద్ధంగా ఉందని వెల్లడించారు.
ఎల్‌నినో ప్రభావాన్ని ఎదుర్కొనేందుకు ముందస్తు ప్రణాళిక
ఎల్‌నినో ప్రభావంతో కరువు పరిస్థితులు ఏర్పడే అవకాశాల నేపథ్యంలో రైతులు ముందుగానే అప్రమత్తం కావాలని ముఖ్యమంత్రి సూచించారు. వర్షాధార పంటలు, తక్కువ నీటితో సాగయ్యే పంటలపై దృష్టి పెట్టాలని కోరారు. మారుతున్న వాతావరణ పరిస్థితులకు అనుగుణంగా పంటల ఎంపిక, సాగు విధానాల్లో మార్పులు చేసుకోవాలని చెప్పారు. ఈ విషయంలో వ్యవసాయ శాస్త్రవేత్తలు రైతులకు తగిన సూచనలు చేయాలని, ఆదర్శ రైతుల అనుభవాలను కూడా పరిగణనలోకి తీసుకోవాలని అన్నారు. కరువు పరిస్థితులను ఎదుర్కొనేందుకు ప్రభుత్వం రైతులకు అండగా ఉంటుందని భరోసా ఇచ్చారు. రైతులు, శాస్త్రవేత్తలతో చర్చించి వ్యవసాయ రంగానికి అవసరమైన ముందస్తు ప్రణాళికలు రూపొందించాలనే ఉద్దేశంతోనే ఈ ముఖాముఖి కార్యక్రమాన్ని నిర్వహించినట్లు తెలిపారు.
కొడంగల్ అభివృద్ధికి భారీ ప్రణాళికలు
కొడంగల్ నియోజకవర్గ అభివృద్ధికి ప్రభుత్వం ప్రత్యేక ప్రణాళికలు రూపొందించిందని రేవంత్‌రెడ్డి తెలిపారు. మక్తల్‌–నారాయణపేట ఎత్తిపోతల పథకానికి సంబంధించి మంత్రి వాకిటి శ్రీహరి ప్రస్తావించిన ఎకరాకు రూ.20 లక్షల పరిహారం అంశాన్ని వివరించారు. గతంలో భూసేకరణ సమయంలో ఎకరాకు రూ.2 లక్షల లోపే పరిహారం అందిన పరిస్థితితో పోల్చుతూ ప్రస్తుత పరిహార విధానాన్ని ప్రస్తావించారు. కొడంగల్ ప్రాంతంలో సుమారు రూ.10 వేల కోట్ల విలువైన అభివృద్ధి పనులు చేపడుతున్నట్లు వెల్లడించారు. రేర్‌ విద్యా కేంద్రం, పారిశ్రామిక పార్కు, కవచర్ల పారిశ్రామిక పార్కు ఏర్పాటు వంటి ప్రణాళికలను వివరించారు. తాండూరు కందులకు ఎగుమతి అవకాశాలు కల్పించడం ద్వారా స్థానిక రైతులకు ప్రయోజనం చేకూర్చే దిశగా చర్యలు చేపడుతున్నట్లు తెలిపారు.
సంక్రాంతి తర్వాత ప్రజాబల కార్యక్రమం
తన ప్రసంగంలో రేవంత్‌రెడ్డి కేసీఆర్‌తో పాటు బీఆర్‌ఎస్‌ నేతలపై రాజకీయ విమర్శలు చేశారు. గత ప్రభుత్వ పాలన, సాగునీటి ప్రాజెక్టుల నిర్మాణం, వాటి ఫలితాలను ప్రస్తావిస్తూ విమర్శలు గుప్పించారు. కేటీఆర్‌ రాజకీయ వ్యాఖ్యలపైనా స్పందించారు. తన గడ్డం, వ్యక్తిగత రూపాన్ని ప్రస్తావిస్తూ చేసిన వ్యాఖ్యలకు రాజకీయంగా సమాధానమిచ్చారు. సంక్రాంతి తర్వాత ప్రజాబల కార్యక్రమం చేపట్టనున్నట్లు ప్రకటించారు. దీపావళి సందర్భంగా ప్రజలకు శుభాకాంక్షలు తెలియజేస్తూ, రాష్ట్ర అభివృద్ధి, రైతుల సంక్షేమం, సాగునీటి ప్రాజెక్టుల పూర్తి లక్ష్యంగా ప్రభుత్వం ముందుకు సాగుతుందని పేర్కొన్నారు.
