కిసాన్‌ సభ మహాసభలను విజ‌య‌వంతం చేయాలి
వ్యవసాయ కార్మిక సంఘం జిల్లా సభ్యుడు ఇసంపల్లి సైదులు పిలుపు
కాకతీయ, నెల్లికుదురు: రైతాంగ హక్కులు, వ్యవసాయ రంగ పరిరక్షణ కోసం ఈ నెల 15 నుంచి 18 వరకు నల్లగొండలో జరిగే అఖిల భారత కిసాన్‌ సభ మహాసభలను జయప్రదం చేయాలని వ్యవసాయ కార్మిక సంఘం జిల్లా సభ్యుడు ఇసంపల్లి సైదులు పిలుపునిచ్చారు. శనివారం నెల్లికుదురు మండల కేంద్రంలో మహాసభల కరపత్రాలను ఆవిష్కరించి మాట్లాడారు. ఢిల్లీలో మూడు వ్యవసాయ చట్టాలకు వ్యతిరేకంగా 13 నెలల పాటు సాగిన ఉద్యమంలో కిసాన్‌ సభ కీలక పాత్ర పోషించిందన్నారు. ఎస్సారెస్పీ కాల్వల ద్వారా చెరువులు నింపడం, ధాన్యం కొనుగోళ్లలో అక్రమాల నివారణ, రుణమాఫీ, పంట నష్టపరిహారం, కౌలు రైతులకు గుర్తింపు కార్డులు, పోడు రైతులకు హక్కు పత్రాల కోసం పోరాటాలు కొనసాగిస్తోందన్నారు. మహాసభల్లో భవిష్యత్తు ఉద్యమ కార్యాచరణ రూపొందిస్తారని తెలిపారు. రైతులు, వ్యవసాయ కార్మికులు, మేధావులు పాల్గొనాలని కోరారు. కార్యక్రమంలో పెరుమాండ్ల పుల్లయ్య తదితరులు పాల్గొన్నారు.
