వృత్తిపై నిబద్ధత కలిగిన వ్యక్తి మహబూబ్ రెడ్డి!
ఏసిపి నాగన్న, వాలీబాల్ అసోసియేషన్ నాయకుల ప్రశంస
పదవీ విరమణ చేసిన ఆర్టీసీ డిపో హెడ్ కానిస్టేబుల్కు ఘన సన్మానం
ఖాకీ చొక్కా విడిచినా క్రీడా స్ఫూర్తిని వీడనని భావోద్వేగం
కాకతీయ, ఇనుగుర్తి : ఉద్యోగ బాధ్యతల్లో వృత్తి పట్ల నిబద్ధత, ప్రవృత్తిపై అమితమైన ప్రేమ ఉన్న అరుదైన వ్యక్తి పరుపాటి మహబూబ్ రెడ్డి అని ఏసిపి నాగన్న, వాలీబాల్ అసోసియేషన్ నాయకులు కొనియాడారు. మహబూబాబాద్ ఆర్టీసీ డిపో హెడ్ కానిస్టేబుల్గా సుదీర్ఘ కాలం పాటు నిరుపమానమైన సేవలు అందించి పదవీ విరమణ పొందిన పరుపాటి మహబూబ్ రెడ్డికి క్రీడా లోకం ఘనంగా నీరాజనం పలికింది. జిల్లా వాలిబాల్ అసోసియేషన్ ఆధ్వర్యంలో ఆదివారం ఆయనను శాలువాలు, పూలమాలలతో ఘనంగా సన్మానించారు. ఈ సందర్భంగా ఏసిపి నాగన్న మాట్లాడుతూ.. ఉద్యోగ బాధ్యతల్లో ఖాకీ దుస్తుల వెనుక ఎంతటి కఠినత్వం ఉన్నా, వాలీబాల్ మైదానంలో ఆయన క్రీడాకారుడిగా చూపిన నిబద్ధత, క్రీడల పట్ల ఆయనకున్న మక్కువ ప్రతి ఒక్కరికీ ఆదర్శమన్నారు. ఒక చేత్తో శాంతిభద్రతలను కాపాడుతూనే, మరోచేత్తో క్రీడారంగాన్ని ప్రోత్సహించడం ఆయనకే సాధ్యమైందని చెప్పారు. ఉద్యోగ విరమణ అనేది కేవలం ఒక సర్వీసుకు మాత్రమేనని, క్రీడలతో ఉన్న బంధానికి ఎప్పటికీ విరమణ ఉండదని స్పష్టం చేశారు.
క్రీడల అభివృద్ధికి శేషజీవితం అంకితం
అనంతరం సన్మాన గ్రహీత, రిటైర్డ్ హెడ్ కానిస్టేబుల్ పరుపాటి మహబూబ్ రెడ్డి భావోద్వేగంతో మాట్లాడుతూ అసోసియేషన్ సభ్యులకు కృతజ్ఞతలు తెలిపారు. తన 30 ఏళ్ల సర్వీసులో ఎన్నో సవాళ్లను ఎదుర్కొన్నానని, కానీ వాలీబాల్ ఆట తనకు ఎల్లప్పుడూ మానసిక ప్రశాంతతను, కొత్త ఉత్సాహాన్ని ఇచ్చిందని గుర్తుచేసుకున్నారు. ఖాకీ చొక్కా విడిచినా.. క్రీడా స్ఫూర్తిని మాత్రం ఎప్పటికీ వీడనన్నారు. వాలీబాల్ అసోసియేషన్ తనను సొంత కుటుంబ సభ్యుడిగా భావించి, ఇంతటి అద్భుతమైన గౌరవాన్ని అందించడం జీవితంలో మరువలేని ఘట్టమని హర్షం వ్యక్తం చేశారు. తన శేష జీవితాన్ని కూడా వీలైనంత వరకు క్రీడల అభివృద్ధికి, తోటి క్రీడాకారుల ప్రోత్సాహానికే అంకితం చేస్తానని ప్రకటించారు. ఈ సన్మాన కార్యక్రమంలో సర్పంచ్ తమ్మడపల్లి కుమార్, వద్దిరాజు పెద్ద వెంకన్న, దిశా కమిటీ మెంబర్ గుజ్జునూరి బాబురావు, కన్నా సాంబయ్య, వెంకటేశ్వర్లు, పరుపాటి రవిందర్ రెడ్డి, రాజేందర్ రెడ్డి, శీలం మధుసూదన్, బేతమల్ల చంద్రయ్య, కుమార్, దేవి రెడ్డి, సంజీవ్ రెడ్డి, వెంకటసోములు, వాలీబాల్ అసోసియేషన్ ప్రతినిధులు, సీనియర్ క్రీడాకారులు, ఆర్టీసీ డిపో సిబ్బంది, క్రీడాభిమానులు మరియు ఇనుగుర్తి గ్రామ ప్రజలు పెద్ద సంఖ్యలో పాల్గొన్నారు.
