విలువల రాజకీయం.. ఎవరిది?
దమ్ముంటే ఎమ్మెల్యే పదవికి రాజీనామా చేసి గెల‌వాలి
ప‌ర‌ప‌తి ఉంటే మంత్రి ప‌ద‌వి తెచ్చుకోవాలి
ద్వంద్వ వైఖరితో కడియం రాజకీయ డొల్లతనం
ఆయన మాట్లాడేది ఒక‌టి..చేసేది మ‌రోక‌టి
కడియంకు కొండా సురేఖ కౌంటర్..
కాకతీయ,వరంగల్ ప్ర‌తినిధి : రాజకీయాల్లో విలువలు.. ఆ మాట వింటేనే కడియం శ్రీహరి నవ్వుతారేమో కానీ, ఇప్పుడు అదే మాటతో మంత్రి కొండా సురేఖ ఆయనకు ‘చుక్కలు’ చూపిస్తున్నారు. ఎమ్మెల్యే పదవికి అంటుకుని.. పార్టీ మారిన కడియం తీరుపై సురేఖ చేసిన వ్యాఖ్యలు ఇప్పుడు జిల్లా రాజకీయాల్లో ‘నిప్పు’ రాజేశాయి. ఎదురుదాడి చేయడం కాదు.. దమ్ముంటే ఎమ్మెల్యే పదవికి రాజీనామా చేసి మళ్లీ గెలిచి చూపించాలని ఆమె విసిరిన సవాల్, కడియం శిబిరంలో కలకలం రేపుతోంది. బిడ్డకు కాంగ్రెస్ కండువా కప్పడం, ఎంపీగా గెలిపించుకోవడం.. ఇదంతా ఒక ఎత్తు అయితే, తాను మాత్రం బీఆర్ఎస్ ఎమ్మెల్యే అని చెప్పుకోవడం మరో ఎత్తు! ఇదే కదా కడియం శ్రీహరి ‘పాలిటిక్స్’ అని కొండా సురేఖ ఎండగట్టారు. కాంగ్రెస్ పార్టీ కండువా కప్పుకోని బిడ్డను ఎంపీని చేసుకున్న కడియం, తానూ కాంగ్రెస్ నాయకుడినని ఎందుకు చెప్పుకోలేకపోతున్నారని ఆమె నిలదీశారు. రాజకీయాల్లో ఒక స్పష్టత ఉండాలి కదా అని సురేఖ అడుగుతున్న ప్రశ్నలకు కడియం వద్ద సమాధానం ఉందా? లేదా ఆయన వౌనం వహిస్తారా? అన్నది ఇప్పుడు పెద్ద ప్రశ్న.
విలువలు.. ఎండమావులేనా?
రాజకీయాల్లో విలువలు ఉండాలని నీతులు చెప్పే కడియం శ్రీహరి, అసలు తన రాజకీయం ఏంటో ముందు ఆత్మపరిశీలన చేసుకోవాలని సురేఖ హితవు పలికారు. తప్పులను సమర్థించుకుంటూ ఎదురుదాడి చేయడం సరికాదని, నైతికత లేని రాజకీయం ప్రజల ముందు ఎలా నిలబడుతుందని ఆమె నిలదీశారు. తన అధికారాన్ని వాడుకుంటూ మంత్రిగా తన పరిధిని దాటి వ్యవహరించడం, మళ్లీ ఇప్పుడు విలువల గురించి మాట్లాడటం విడ్డూరంగా ఉందని సురేఖ వ్యంగ్యాస్త్రాలు విసిరారు.
అసంతృప్తి సెగలు!
స్టేషన్ ఘన్‌పూర్ ఎమ్మెల్యేగా గెలిచి, పార్టీ మారినా పదవిని వదులుకోని కడియం తీరుపై కాంగ్రెస్ పార్టీలో అసహనం పెరుగుతోంది. కొండా సురేఖ నేరుగా రంగంలోకి దిగి ఆయనపై చేసిన ఈ విమర్శలు.. జిల్లా రాజకీయాల్లో కొత్త మలుపులకు దారితీస్తున్నాయి. కడియం అనుసరిస్తున్న ఈ ‘ద్వంద్వ’ రాజకీయంపై సురేఖ చేసిన కామెంట్స్ ఇప్పుడు సోషల్ మీడియాలోనూ వైరల్ అవుతున్నాయి. రాజకీయాల్లో ‘విలువలు’ అనే పదాన్ని ఇప్పుడు ఎవరికి వారు తమకు అనుకూలంగా వాడుకుంటూ, ప్రజలను అయోమయంలో పడేస్తున్నారన్న విమర్శలు వినబడుతున్నాయి.
