ఎప్పుడు తెరుస్తారో… ఎప్పుడు మూస్తారో..!
పెద్దవంగరలో అస్తవ్యస్తంగా అంగన్‌వాడీ కేంద్రాల నిర్వహణ
పౌష్టికాహారానికి దూరమవుతున్న గర్భిణులు, చిన్నారులు
కాకతీయ, పెద్దవంగర : గర్భిణులు, బాలింతలు, చిన్నారులకు పౌష్టికాహారం అందించేందుకు ప్రభుత్వం ఏర్పాటు చేసిన అంగన్‌వాడీ కేంద్రాల నిర్వహణ పెద్దవంగర మండలంలో ప్రశ్నార్థకంగా మారింది. కేంద్రాలు ఎప్పుడు తెరుస్తారో, ఎప్పుడు మూసేస్తారో తెలియని పరిస్థితి నెలకొనడంతో లబ్ధిదారులు తీవ్ర ఇబ్బందులు ఎదుర్కొంటున్నారు. మండలంలోని బొమ్మకల్ గ్రామం రెండో అంగన్‌వాడీ కేంద్రానికి తరచూ తాళం వేస్తున్నారని గ్రామస్తులు ఆరోపిస్తున్నారు. ప్రభుత్వం స్పష్టమైన ఆదేశాలు జారీ చేసినప్పటికీ గర్భిణులు, బాలింతలు, చిన్నారులకు అందాల్సిన పౌష్టికాహారం సక్రమంగా పంపిణీ కావడం లేదని వారు ఆవేదన వ్యక్తం చేస్తున్నారు.
నాణ్యతపై కూడా విమర్శలు
కొన్ని కేంద్రాలు తెరిచినా పంపిణీ చేస్తున్న గుడ్లు నాణ్యత లేనివిగా, చిన్న పరిమాణంలో ఉన్నాయని లబ్ధిదారులు చెబుతున్నారు. దీనిపై ప్రశ్నిస్తే “మాకు వచ్చినవే ఇవి” అంటూ సిబ్బంది సమాధానం ఇస్తున్నారని ఆరోపిస్తున్నారు. గుడ్ల సరఫరాలో కూడా పర్యవేక్షణ లోపిస్తోందన్న విమర్శలు వినిపిస్తున్నాయి. ఈ విషయమై సీడీపీఓ రేష్మను వివరణ కోరగా, బొమ్మకల్ రెండో అంగన్‌వాడీ కేంద్రంలో కొన్ని సమస్యలు ఉన్నాయని అంగీకరించారు. సంబంధిత సిబ్బంది పనితీరు మెరుగుపడకపోతే జిల్లా కలెక్టర్ దృష్టికి తీసుకెళ్తామని, విధులు సక్రమంగా నిర్వహించని అంగన్‌వాడీ సిబ్బందికి నోటీసులు జారీ చేస్తామని తెలిపారు.
