తమ్ముడిని హత్య చేసిన అన్న అరెస్ట్‌
డబ్బుల విషయంలో గొడవలే హత్యకు కారణం
ఏసీపీ మామునూరు ఎన్‌. వెంకటేష్‌
గ‌రీబ్‌న‌గ‌ర్ మ‌ర్డ‌ర్ కేసులో నిందితుడి అరెస్టు
కాకతీయ, గీసుగొండ : గీసుగొండ పోలీస్‌స్టేషన్‌ పరిధిలోని గరీబ్‌నగర్‌లో తమ్ముడిని కత్తితో పొడిచి హత్య చేసిన కేసును పోలీసులు 24 గంటల్లో ఛేదించి నిందితుడిని అరెస్ట్‌ చేశారు. ఏసీపీ మామునూరు ఎన్‌. వెంకటేష్‌ తెలిపిన వివరాల ప్రకారం.. 19-09-2026 రాత్రి 21:30 గంటల సమయంలో అద్దె ఇంట్లో ఎలుబాక ప్రసాద్‌ (31) కత్తిపోట్లకు గురై మృతి చెందాడు. మృతుడి తల్లి ఎలుబాక సుజాత ఫిర్యాదుతో కేసు నమోదు చేసి దర్యాప్తు చేపట్టారు. దర్యాప్తులో ప్రసాద్‌ అన్న ఎలుబాక ప్రవీణ్‌ (33) నిందితుడిగా గుర్తించారు. తల్లి వద్ద డబ్బులు అడిగే విషయంలో గతంలో ఇద్దరి మధ్య పలుమార్లు గొడవలు జరిగినట్లు పోలీసులు తెలిపారు. ఈ క్రమంలో కక్ష పెంచుకున్న ప్రవీణ్‌ తమ్ముడిని హత్య చేయాలని నిర్ణయించుకున్నట్లు దర్యాప్తులో వెల్లడైందన్నారు. 19వ తేదీ రాత్రి తల్లి నైట్‌ డ్యూటీకి వెళ్లిన సమయంలో ఇంటికి వెళ్లిన ప్రవీణ్‌ ప్రసాద్‌తో గొడవపడి, తాను తయారు చేసుకున్న కత్తితో వీపు, ఛాతి, భుజంపై పలుమార్లు పొడిచినట్లు తెలిపారు. దాడి అనంతరం నిందితుడు తన తల్లిని కూడా బెదిరించినట్లు పోలీసులు తెలిపారు. 20-09-2026 తెల్లవారుజామున తన బొటనవేలికి అయిన గాయానికి ఆర్‌ఎంపీ వైద్యుడి వద్ద చికిత్స తీసుకున్నాడు. 21-09-2026న ప్రవీణ్‌ను పోలీసులు అదుపులోకి తీసుకుని, అతని సమాచారం మేరకు పొదల్లో దాచిన హత్యకు ఉపయోగించిన కత్తి, రక్తపు మరకలున్న దుస్తులను స్వాధీనం చేసుకున్నారు. ఈస్ట్‌జోన్‌ క్లూస్‌ టీమ్‌ శాస్త్రీయ ఆధారాలు సేకరించింది. నిందితుడిని రిమాండ్‌కు తరలించారు.
