‘ఎల్ నినో’ను ఎదుర్కొనేందుకు సిద్ధం కావాలి!
– మండల ప్రత్యేక అధికారి వై శ్రీకాంత్ రెడ్డి పిలుపు
– త్రాగునీరు,పశుగ్రాస కొరత రాకుండా చర్యలు చేపట్టాలి
– అన్ని శాఖలు సమన్వయంతో పని చేసినపుడే కరువు పరిస్థితులకు చెక్
కాకతీయ,రాయపర్తి :
రాబోయే రోజుల్లో ఎల్ నినో ప్రభావం వల్ల ఎదురయ్యే వాతావరణ మార్పులు,కరువు పరిస్థితులను ఎదుర్కొనేందుకు మండల యంత్రాంగం పూర్తి సన్నద్ధంగా ఉండాలని మండల ప్రత్యేక అధికారి వై శ్రీకాంత్ రెడ్డి అధికారులకు పిలుపునిచ్చారు.శనివారం మండల పరిషత్ కార్యాలయ సమావేశ మందిరంలో వివిధ శాఖల అధికారులతో ఆయన ప్రత్యేక సమీక్ష సమావేశం నిర్వహించారు.ఈ సందర్భంగా ప్రత్యేక అధికారి మాట్లాడుతూ…ఎల్ నినో ప్రభావంతో వర్షాభావ పరిస్థితులు,తాగునీటి ఎద్దడి,పశుగ్రాస కొరత ఏర్పడే అవకాశం ఉందన్నారు.ముందస్తు ప్రణాళికతో ఎలాంటి అత్యవసర పరిస్థితినైనా ఎదుర్కొనేందుకు అన్ని శాఖల అధికారులు సిద్ధం కావాలని ఆదేశించారు.ముఖ్యంగా గ్రామాల్లో తాగునీటి ఎద్దడి తలెత్తకుండా చేతి పంపులు, బోర్ వెల్స్ కు తక్షణమే మరమ్మత్తులు చేయించాలని సూచించారు.వ్యవసాయ రంగంపై ఎక్కువ ప్రభావం పడుతున్నందున తక్కువ నీటితో పండే ప్రత్యామ్నాయ పంటలపై రైతులకు అవగాహన కల్పించాలన్నారు. వర్షాభావ పరిస్థితులను తట్టుకుని భూగర్భ జలమట్టాన్ని పెంచేందుకు వి బి జి రామ్ జి (ఉపాధి హామీ పథకం) ద్వారా గ్రామీణ ప్రాంతాల్లో ఇంకుడు గుంతలు,ఫామ్ పాండ్స్ నిర్మించుకునేలా చర్యలు తీసుకోవాలని అన్నారు.రైతులు ప్రజలందరూ వీటిని నిర్మించుకునేం దుకుగాను విస్తృత అవగాహన కల్పించాలని అధికారులను ఆదేశించారు.శాఖల మధ్య సమన్వయం లోపిస్తే సహించేది లేదని క్షేత్రస్థాయి పరిస్థితులపై ఎప్పటికప్పుడు నివేదికలు అందించాలని స్పష్టం చేశారు.ఈ సమావేశంలో తహసిల్దారు ముల్కనూరి శ్రీనివాస్,ఎంపీడీవో పాక శ్రీనివాసులు,ఏవో గుమ్మడి వీరభద్రం,ఎంపీఓ కూచన ప్రకాష్,ఇరిగేషన్ ఏఈ,ఆర్డబ్ల్యూఎస్ ఏఈ,విద్యుత్ శాఖ ఏఈ,ఫీల్డ్ అసిస్టెంట్లు,ఉపాధి హామీ సిబ్బంది,వెటర్నరీ డాక్టర్లు, ఆరోగ్యశాఖ అధికారులు,పంచాయతీ కార్యదర్శులు,ఏపీఓ పాల్గొన్నారు.
