గ్రామాల సమగ్రాభివృద్ధే లక్ష్యం
విద్యతోపాటు వ్యక్తిగత భద్రతపై అవగాహన అవసరం : మంత్రి సీతక్క
వెంకటాపూర్‌లో రూ.99 లక్షల అభివృద్ధి పనులు ప్రారంభం
కాకతీయ, ములుగు : గ్రామాల సమగ్రాభివృద్ధికి ప్రజా ప్రభుత్వం కట్టుబడి ఉందని, మౌలిక సదుపాయాల కల్పనకు అవసరమైన నిధులు కేటాయిస్తున్నామని రాష్ట్ర పంచాయతీరాజ్‌, గ్రామీణాభివృద్ధి, గ్రామీణ నీటి సరఫరా, మహిళా, శిశు సంక్షేమ శాఖల మంత్రి దనసరి అనసూయ సీతక్క అన్నారు. గురువారం వెంకటాపూర్‌ మండల కేంద్రంలో రూ.99 లక్షల అంచనా వ్యయంతో చేపట్టిన సీసీ రోడ్లు, మురుగునీటి కాలువలను మంత్రి సీతక్క ప్రారంభించారు. సీఆర్‌ఆర్‌ ప్లెయిన్‌ 2025–26 నిధులతో రూ.54 లక్షల వ్యయంతో సీసీ రోడ్లు, సీఆర్‌ఆర్‌ ఎస్సీ ఉప ప్రణాళిక 2024–25 నిధులతో రూ.45 లక్షల వ్యయంతో మురుగునీటి కాలువల పనులు చేపట్టినట్లు తెలిపారు. గతంలో కాలనీలో పర్యటించినప్పుడు ఇచ్చిన హామీ మేరకు పనులు మంజూరు చేశామని ప్రజల అవసరాలు, స్థానిక ప్రజాప్రతినిధుల విజ్ఞప్తులకు అనుగుణంగా అభివృద్ధి పనులు చేపడుతున్నామన్నారు. గ్రామాల్లో రహదారులు, మురుగునీటి కాలువలు, తాగునీటి సదుపాయాల కల్పనకు ప్రాధాన్యమిస్తామని స్పష్టం చేశారు. ఆశించిన స్థాయిలో వర్షాలు కురవని నేపథ్యంలో రైతులు, వ్యవసాయ కూలీలు, మహిళలు నీటిని పొదుపుగా వినియోగించుకోవాలని సూచించారు. అంతకుముందు వెంకటాపూర్‌ ప్రాథమిక వ్యవసాయ సహకార సంఘం నూతన కమిటీ ప్రమాణ స్వీకార కార్యక్రమంలో పాల్గొని చైర్మన్‌ శ్రీనివాస్‌, సభ్యులకు శుభాకాంక్షలు తెలిపారు.
బాలల రక్షణపై అవగాహన తప్పనిసరి
గ్రామాల అభివృద్ధితోపాటు విద్యార్థుల విద్య, భద్రతకు ప్రాధాన్యమివ్వాలని మంత్రి సీతక్క పేర్కొన్నారు. గురువారం గోవిందరావుపేట మండలం పసర జిల్లా పరిషత్‌ ఉన్నత పాఠశాలలో జిల్లా న్యాయ సేవాధికార సంస్థ ఆధ్వర్యంలో ‘సురక్షిత్‌ బచ్‌పన్‌ అభియాన్‌’లో భాగంగా నిర్వహించిన అవగాహన కార్యక్రమంలో మంత్రి సీతక్క పాల్గొన్నారు. ప్రపంచంలో అత్యంత శక్తివంతమైనది విద్యేనని, విద్యార్థులు ఉన్నత లక్ష్యాలతో చదువుకొని స్వశక్తితో ఎదగాలని సూచించారు. చదువుతోపాటు వ్యక్తిగత భద్రతపై అవగాహన పెంచుకోవాలని, పాఠశాలల్లో, ప్రయాణాల్లో, ఇళ్ల వద్ద ఎదురయ్యే వేధింపులను గుర్తించి అప్రమత్తంగా ఉండాలని తెలిపారు. మంచి స్పర్శ, చెడు స్పర్శ మధ్య తేడాను తెలుసుకోవడం ముఖ్యమన్నారు. కార్యక్రమంలో పోక్సో చట్టం, సైబర్‌ నేరాలు, బాలల అక్రమ రవాణా నివారణ, బాలల రక్షణ చట్టాలపై అవగాహన కల్పించడంతోపాటు మాట్లాడే బొమ్మ ద్వారా మంచి స్పర్శ, చెడు స్పర్శను వివరించారు. ఈ కార్యక్రమాల్లో జిల్లా గ్రంథాలయ సంస్థ చైర్మన్‌ బానోతు రవిచందర్‌, పంచాయతీరాజ్‌ డైరెక్టర్‌ బైరెడ్డి భగవాన్‌రెడ్డి, జిల్లా సహకార అధికారి రామ్మోహన్‌, జిల్లా సంక్షేమ అధికారి ప్రేమలత, స్థానిక ప్రజాప్రతినిధులు, ఉపాధ్యాయులు, అధికారులు పాల్గొన్నారు.
