ఇద్దరు అటవీ అధికారుల సస్పెన్షన్‌!
గూడూరు డిప్యూటీ రేంజ్‌ అధికారి, ఫారెస్ట్‌ సెక్షన్‌ ఆఫీసర్‌పై చర్యలు
బ్రాహ్మణపల్లి, దామరవంచ ఏజెన్సీ ప్రాంతాల్లో అక్రమ నరికివేత
నకిలీ అనుమతులతో కలప రవాణా చేసినట్లు విచారణలో వెల్లడి
ఉత్తర్వులు జారీ చేసిన భద్రాద్రి సర్కిల్ సీసీఎఫ్ భీమానాయ‌క్‌
కాకతీయ, హ‌న్మ‌కొండ : ఏజెన్సీ ప్రాంతాల్లో మామిడి చెట్ల అక్రమ నరికివేత, నకిలీ అనుమతులతో కలప రవాణా వ్యవహారంలో ఇద్దరు అటవీశాఖ అధికారులపై సస్పెన్షన్‌ వేటు పడింది. గూడూరు డిప్యూటీ రేంజ్‌ అధికారి ఎం.ఆర్‌. పిచ్చేశ్వరరావు, మాచర్ల ఫారెస్ట్‌ సెక్షన్‌ ఆఫీసర్‌ బి. శ్రీనుపై భద్రాద్రి సర్కిల్ అటవీ సంరక్షణాధికారి డాక్టర్‌ డి. భీమా నాయక్ బుధవారం వేర్వేరుగా ఉత్తర్వులు జారీ చేశారు. గూడూరు మండలం బ్రహ్మణపల్లి, దామరవంచ గ్రామాల ఏజెన్సీ ప్రాంతాల్లో 2026 ఆగస్టు 10 నుంచి సెప్టెంబర్‌ 30 మధ్య నకిలీ నిరభ్యంతర పత్రాలు, అనుమతులతో మామిడి చెట్లను నరికి కలప రవాణా చేసినట్లు ఫ్లయింగ్‌ స్క్వాడ్‌ విచారణలో గుర్తించారు. ఈ వ్యవహారంలో డిప్యూటీ రేంజ్‌ అధికారి పిచ్చేశ్వరరావు, ఫారెస్ట్‌ సెక్షన్‌ ఆఫీసర్‌ శ్రీను విధుల పట్ల తీవ్ర నిర్లక్ష్యం వహించడంతో పాటు కిందిస్థాయి సిబ్బందిపై పర్యవేక్షణ చేయలేదని విచారణ నివేదికల్లో పేర్కొన్నారు. అక్రమ నరికివేత, రవాణాకు సంబంధించి తగిన ఆధారాలు లభించాయని ఉత్తర్వుల్లో వెల్లడించారు. తెలంగాణ సివిల్‌ సర్వీసెస్‌ నిబంధనల ప్రకారం ఇద్దరినీ సస్పెండ్‌ చేశారు. తదుపరి క్రమశిక్షణ చర్యలు పూర్తయ్యే వరకు సస్పెన్షన్‌ కొనసాగుతుందని స్పష్టం చేశారు. సస్పెన్షన్‌ కాలంలో ఇద్దరూ గూడూరులోనే ప్రధాన కార్యాలయంలో ఉండాలని, ఉన్నతాధికారి ముందస్తు అనుమతి లేకుండా బయటకు వెళ్లరాదని ఆదేశించారు.
