బతుకమ్మ సంబరాల్లో ములుగు కలెక్టరేట్‌
మహిళా ఉద్యోగులతో కలిసి బతుకమ్మ ఆడిన మంత్రి సీతక్క
32 మంది లబ్ధిదారులకు రూ.32.03 లక్షల విలువైన చెక్కుల పంపిణీ
కాకతీయ, ములుగు: తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను ములుగు జిల్లా సమీకృత కలెక్టరేట్‌ ప్రాంగణంలో శుక్రవారం ఘనంగా నిర్వహించారు. జిల్లా కలెక్టర్‌ బోర్ఖడే హేమంత్‌ సహదేవరావు అధ్యక్షతన జరిగిన వేడుకలకు రాష్ట్ర పంచాయతీరాజ్‌, గ్రామీణాభివృద్ధి, గ్రామీణ నీటి సరఫరా, మహిళా శిశు సంక్షేమ శాఖల మంత్రి దనసరి అనసూయ సీతక్క ముఖ్యఅతిథిగా హాజరయ్యారు. సంప్రదాయబద్ధంగా గౌరమ్మకు పూజలు చేసి బతుకమ్మ సంబరాలను ప్రారంభించారు. రంగురంగుల పూలతో పేర్చిన బతుకమ్మలతో కలెక్టరేట్‌ ప్రాంగణం పూలవనంలా మారగా, మహిళా అధికారులు, ఉద్యోగులతో కలిసి మంత్రి సీతక్క బతుకమ్మ ఆడి సందడి చేశారు.
మహిళలు శాసించే స్థాయికి ఎదగాలి
ఈ సందర్భంగా మంత్రి సీతక్క మాట్లాడుతూ బతుకమ్మ తెలంగాణ సంస్కృతి, సంప్రదాయాలు, జీవన విధానానికి ప్రతీక అని అన్నారు. తరతరాలుగా వస్తున్న ఆచారాలను కాపాడుకోవాల్సిన బాధ్యత ప్రతి ఒక్కరిపై ఉందని పేర్కొన్నారు. మహిళలు యాచించే స్థాయి నుంచి శాసించే స్థాయికి ఎదగాలన్నదే ముఖ్యమంత్రి రేవంత్‌రెడ్డి ఆశయమని తెలిపారు. మహిళలు అన్ని రంగాల్లో రాణిస్తూ ఆర్థికంగా, సామాజికంగా అభివృద్ధి చెందాలని ఆకాంక్షించారు. ప్రభుత్వ ఉద్యోగులు అంకితభావంతో విధులు నిర్వహిస్తూ ప్రజలకు మెరుగైన సేవలందించాలని సూచించారు. సద్దుల బతుకమ్మ, దసరా పండుగలను ప్రజలంతా సంతోషంగా జరుపుకోవాలని శుభాకాంక్షలు తెలిపారు.
32 మంది లబ్ధిదారులకు చెక్కుల పంపిణీ
జిల్లా కలెక్టర్‌ బోర్ఖడే హేమంత్‌ సహదేవరావు మాట్లాడుతూ బతుకమ్మ పండుగ ప్రజల్లో ఐక్యత, ఆనందాన్ని పెంపొందిస్తుందని అన్నారు. తెలంగాణలో బతుకమ్మ, దసరా వేడుకలు ప్రత్యేక ఆకర్షణగా నిలుస్తాయని పేర్కొన్నారు. అనంతరం మంత్రి సీతక్క ములుగు మండలానికి చెందిన 25 మంది, మల్లంపల్లి మండలానికి చెందిన ఏడుగురు కలిపి మొత్తం 32 మంది లబ్ధిదారులకు రూ.32,03,712 విలువైన కల్యాణలక్ష్మి, షాదీ ముబారక్‌ చెక్కులను పంపిణీ చేశారు. ఈ కార్యక్రమంలో జిల్లా ఎస్పీ సుధీర్‌ రామ్‌నాథ్‌ కేకన్‌, అదనపు కలెక్టర్లు సీహెచ్‌ మహేందర్‌ జి, సంపత్‌రావు, ములుగు మున్సిపల్‌ చైర్‌పర్సన్‌ చింతనిప్పుల చంద్రకళ, జిల్లా గ్రంథాలయ సంస్థ చైర్మన్‌ బానోతు రవిచందర్‌, మార్కెట్‌ కమిటీ చైర్‌పర్సన్‌ రేగ కళ్యాణి, మున్సిపల్‌ వైస్‌ చైర్‌పర్సన్‌ ఆసియా షాహిన్‌, రాష్ట్ర పంచాయతీరాజ్‌ డైరెక్టర్‌ భగవాన్‌రెడ్డి, కౌన్సిలర్లు, జిల్లా అధికారులు, మహిళా ఉద్యోగులు, సిబ్బంది పాల్గొన్నారు.
