తమ్ముడిని హత్య చేసిన అన్నకు జీవిత ఖైదు!
వరంగల్ ప్రధాన జిల్లా న్యాయస్థానం తీర్పు
కాకతీయ, నల్లబెల్లి: కన్నతల్లి కళ్ల ముందే కుటుంబంలో విషాదం నింపిన తమ్ముడి హత్య కేసులో నిందితుడైన అన్నకు న్యాయస్థానం జీవిత ఖైదు విధించింది. నల్లబెల్లి మండలం నందిగామ గ్రామానికి చెందిన కుండె రవి (40), తన తమ్ముడు కుండె కుమార్‌ (32)ను హత్య చేసిన కేసులో వరంగల్ ప్రధాన జిల్లా న్యాయస్థానం గురువారం ఈ తీర్పు వెలువరించింది. నిందితుడికి జీవిత ఖైదుతోపాటు రూ.2 వేల జరిమానా విధించింది. మృతుడి తల్లి కుండె ఇలమ్మ ఫిర్యాదు మేరకు నల్లబెల్లి పోలీస్‌స్టేషన్‌లో క్రైమ్‌ నంబర్‌ 18/2024గా ఐపీసీ 302 సెక్షన్‌ కింద కేసు నమోదైంది. అప్పటి దుగ్గొండి సీఐ పి. కిషన్‌ దర్యాప్తు చేపట్టగా, అనంతరం సీఐ బి. రాజగోపాల్‌ అభియోగపత్రం దాఖలు చేశారు. ఎస్సీ నంబర్‌ 30/2026గా విచారణకు వచ్చిన కేసులో పబ్లిక్‌ ప్రాసిక్యూటర్‌ మురళీధర్‌రావు ప్రాసిక్యూషన్‌ తరఫున వాదనలు వినిపించారు. దర్యాప్తులో సేకరించిన ఆధారాలను పరిశీలించిన న్యాయస్థానం నిందితుడికి శిక్ష విధించింది. ప్రస్తుతం కేసు పర్యవేక్షణ బాధ్యతలను దుగ్గొండి సీఐ జె. శంకర్‌రావు నిర్వహిస్తున్నారు. కోర్టు లైజన్‌ అధికారిగా ఎస్‌ఐ కాంతేటి హరికృష్ణ, కోర్టు డ్యూటీ అధికారిగా ఖానాపూర్‌ పోలీస్‌స్టేషన్‌ పీసీ 2473 నామిండ్ల మహేశ్‌ సమన్వయం చేశారు. సమర్థవంతంగా దర్యాప్తు చేసి, పటిష్ట ఆధారాలు సమర్పించిన పోలీసు అధికారులను ఉన్నతాధికారులు అభినందించారు.
