భవిష్యత్ ప్రగతి కి విద్యే మార్గం
రైజింగ్ -2047 పాలసీ లో ప్రాధాన్యం కల్పించాలి
ఉన్నతాధికారులతో మంత్రి పొన్నం సమీక్ష
కాకతీయ, హైదరాబాద్ : బీసీ సంక్షేమ శాఖ లో భవిష్యత్ ప్రగతి కి విద్యే మార్గమని, దానికి ప్రథమ ప్రాధాన్యం కల్పించేలా చర్యలు తీసుకోవాలని బీసీ సంక్షేమ శాఖ ఉన్నతాధికారులకు మంత్రి పొన్నం ప్రభాకర్ సూచించారు. శుక్రవారం ఉదయం మినిస్టర్స్ క్వార్టర్స్లో తెలంగాణ రైజింగ్ -2047 పాలసీలో భాగంగా గ్లోబల్ సమ్మిట్లో బీసీ సంక్షేమ శాఖలో తీసుకోవాల్సిన అంశాలపై సమీక్షా నిర్వహించారు. ఈసందర్భంగా మంత్రి మాట్లాడుతూ తెలంగాణ జనాభాలో వెనుకబడిన తరగతులు 56% శాతం ఉన్నారని అన్నారు. వ్యవసాయం, చేతివృత్తులు, నైపుణ్యాల రంగంలో వీరిదే అగ్రభాగమని అన్నారు. ఈ సామాజిక వర్గాలకు చెందిన వారే సంప్రదాయ వృత్తులకు వెన్నెముకగా నిలుస్తున్నారని అన్నారు. వారి సామాజిక ఆర్థిక పురోగతి రాష్ట్ర వృద్ధికి కీలకమైందని స్పష్టం చేశారు. విజన్ 2047 లో బీసీలు విద్యాపరంగా బలంగా, ఆర్థికంగా స్వతంత్రంగా, సామాజికంగా సాధికారత సాధించి, ఆవిష్కరణ, నైపుణ్యాభివృద్ధి మరియు రాష్ట్ర వృద్ధికి చోదకంగా ప్రపంచవ్యాప్తంగా పోటీతత్వాన్ని ఎదుర్కునేలా చర్యలు తీసుకోవాలని సూచించారు. విద్య, మానవ మూలధనం నిరంతరాయంగా నాణ్యమైన అభ్యాసం ద్వారా విద్యా ప్రమాణాలను బలోపేతం చేయడం, మెరుగుపరచడం మరియు రెసిడెన్షియల్ సంస్థలు, హాస్టళ్లను అత్యుత్తమ కేంద్రాలుగా అభివృద్ధి చేయాలన్నారు. ఉన్నత పాఠశాల నుండే ఆర్థిక అక్షరాస్యత, డిజిటల్ అక్షరాస్యత వ్యవస్థాపకతను పరిచయం చేయాలన్నారు. గ్లోబల్ సమ్మిట్ లో చర్చించి రైజింగ్ తెలంగాణ విజన్ 2047 లో పలు కీలక అంశాలు చేర్చేలా మంత్రి సూచనలు చేశారు. సమీక్షా సమావేశంలో బీసీ సంక్షేమ శాఖ ప్రిన్సిపల్ సెక్రటరీ శ్రీధర్, గురుకుల సెక్రటరీ సైదులు, బీసీ సంక్షేమ శాఖ అడిషనల్ డైరెక్టర్ అలోక్ కుమార్ ఇతర అధికారులు పాల్గొన్నారు.
