ఓటు చోరీపై సమరభేరి!
నవంబర్‌ 1న ఢిల్లీ నిరసనకు సన్నాహాలు
గల్లీగల్లీలో ఓటు హక్కుల పరిరక్షణ ఉద్యమం
ఎన్నికల సంఘం ప్రధాన కమిషనర్‌ రాజీనామా చేయాలి
మంత్రి పొన్నం ప్రభాకర్‌ పిలుపు
కాకతీయ, సికింద్రాబాద్‌: ఓటు హక్కుల పరిరక్షణ కోసం దేశవ్యాప్తంగా చేపట్టిన ‘ఓట్‌ బచావో–దేశ్‌ బచావో’ ఉద్యమంలో తెలంగాణ గళాన్ని ఢిల్లీలో వినిపించాలని రాష్ట్ర మంత్రి పొన్నం ప్రభాకర్‌ పిలుపునిచ్చారు. నవంబర్‌ 1న ఢిల్లీలో నిర్వహించనున్న భారీ నిరసన కార్యక్రమం నేపథ్యంలో సికింద్రాబాద్‌ డీసీసీ అధ్యక్షుడు దీపక్‌ జాన్‌ ఆధ్వర్యంలో కంటోన్మెంట్‌ నియోజకవర్గంలో సోమవారం సన్నాహక సమావేశం నిర్వహించారు. ఈ సందర్భంగా పొన్నం మాట్లాడుతూ.. ప్రజాస్వామ్యాన్ని కాపాడే ఆయుధమైన ఓటు హక్కే నేడు ప్రమాదంలో పడిందని, ఎస్సీ, ఎస్టీ, బీసీ, మైనారిటీల ఓట్లను అక్రమంగా తొలగిస్తున్నారని ఆరోపించారు. ఎన్నికల సంఘం బీజేపీకి అనుబంధ సంస్థలా వ్యవహరిస్తోందని విమర్శించారు. రాజ్యాంగాన్ని మార్చే ప్రయత్నాలను రాహుల్‌గాంధీ ముందుగానే గుర్తించి ప్రజలను అప్రమత్తం చేశారని పేర్కొన్నారు. తెలంగాణ ఏర్పాటు బిల్లుకు రాజ్యసభలో మద్దతు తెలిపిన ఏఐసీసీ ప్రధాన కార్యదర్శి అవినాష్‌ పాండేకు ప్రత్యేక కృతజ్ఞతలు తెలిపారు. ఓటర్ల జాబితాల సవరణలో అక్రమాలను ప్రశ్నిస్తే కేసులతో వేధిస్తున్నారని, రాహుల్‌గాంధీ, ప్రియాంకగాంధీ, మల్లికార్జున ఖర్గే, ఇండియా కూటమి ఎంపీల అరెస్టులతో ఉద్యమాన్ని అడ్డుకోలేరని పొన్నం అన్నారు. ప్రధాన ఎన్నికల కమిషనర్‌ జ్ఞానేశ్‌ కుమార్‌ రాజీనామా చేయాలని డిమాండ్‌ చేశారు. ‘ఓట్‌ చోరీ–గద్దీ ఛోడో’ నినాదంతో పోరాటాన్ని గల్లీగల్లీకి తీసుకెళ్లాలని కాంగ్రెస్‌ శ్రేణులకు పిలుపునిచ్చారు. ఢిల్లీ నిరసనలో హైదరాబాద్ ప్రజాప్రతినిధులు, పార్టీ నాయకులు, కార్యకర్తలు సమష్టిగా పాల్గొనాలని కోరారు. సమావేశంలో ఏఐసీసీ ప్రధాన కార్యదర్శి అవినాష్‌ పాండే, ఏఐసీసీ ఇన్‌చార్జి కార్యదర్శి సచిన్‌ సావంత్‌, రాజ్యసభ సభ్యుడు అనిల్‌కుమార్‌ యాదవ్‌, ఎమ్మెల్యే శ్రీ గణేశ్‌, సికింద్రాబాద్‌ డీసీసీ అధ్యక్షుడు దీపక్‌ జాన్‌, ఇతర నియోజకవర్గాల నాయకులు పాల్గొన్నారు.
