నీటి పొదుపే.. భవిష్యత్తుకు భరోసా!
ప్రతి ఇంట్లో 20 శాతం నీటి వినియోగం తగ్గించాలి
లీకేజీలను అరికట్టి.. పునర్వినియోగాన్ని ప్రోత్సహించాలి
సైబరాబాద్‌ రీజియన్‌ ఎగ్జిక్యూటివ్‌ డైరెక్టర్‌ సంతోష్‌
కాకతీయ, హైదరాబాద్ : రానున్న వేసవి పరిస్థితులను దృష్టిలో ఉంచుకుని నీటిని పొదుపుగా వినియోగించేలా ప్రజల్లో విస్తృత అవగాహన కల్పించాలని సైబరాబాద్‌ రీజియన్‌ ఎగ్జిక్యూటివ్‌ డైరెక్టర్‌ సంతోష్‌ సూచించారు. నీటి పొదుపు, పునర్వినియోగంపై ప్రజలను చైతన్యపరిచేందుకు సోమవారం కూకట్‌పల్లి పరిధిలో జలమండలి ఆధ్వర్యంలో ప్రత్యేక కార్యక్రమం నిర్వహించారు. ఈ సందర్భంగా ‘సేవ్‌ వాటర్‌–రీయూజ్‌ వాటర్‌’ ప్రచార పోస్టర్లను విడుదల చేసి, క్షేత్రస్థాయిలో ప్రచారం కోసం లైన్‌మెన్లకు అనౌన్స్‌మెంట్‌ పరికరాలను అందజేశారు. ప్రతి ఇంట్లో కనీసం 20 శాతం నీటి వినియోగాన్ని తగ్గించేలా ప్రజలకు అవగాహన కల్పించాలని అధికారులను సంతోష్‌ ఆదేశించారు. లైన్‌మెన్లు విధి నిర్వహణ సమయంలో ఉదయం, సాయంత్రం అనౌన్స్‌మెంట్ల ద్వారా నీటి పొదుపు, పునర్వినియోగంపై ప్రచారం చేయాలన్నారు. పైపులైన్లు, కుళాయిల లీకేజీలను గుర్తించి వెంటనే అరికట్టాలని సూచించారు. వాహనాలు కడగడం, ఇళ్లను శుభ్రం చేయడం వంటి పనులకు పైపుల ద్వారా నీటిని వృథా చేయకుండా బకెట్లను వినియోగించేలా ప్రజలకు వివరించాలని తెలిపారు. తాగునీరు అవసరం లేని పనులకు శుద్ధి చేసిన నీటిని ఉపయోగించేలా ప్రోత్సహించాలని పేర్కొన్నారు. కార్యక్రమంలో సైబరాబాద్‌ డైరెక్టర్‌ ఆఫ్‌ ఆపరేషన్స్‌ నారాయణ, కూకట్‌పల్లి జనరల్ మేనేజర్‌, డీజీఎంలు, మేనేజర్లు, లైన్‌మెన్లు పాల్గొన్నారు.
